ԱԺ ՀԱԿ խմբակցության պատգամավոր Նիկոլ Փաշինյանը մայիսի 26-ին խորհրդարանում 2013թ. պետական բյուջեի կատարողականի մասին հաշվետվության քննարկումներին ԿԲ նախագահ Արթուր Ջավադյանին դիմելով՝ նշեց, որ 2013-ը աննախադեպ տարի էր արտաքին պարտքի առումով՝ 861 մլն դոլար արտաքին պարտք՝ այն դեպքում, երբ 2012-ին այն եղել է 139 մլն, իսկ 2011-ին՝ 101 մլն։ Փաշինյանը հետաքրքրվեց՝ միանգամից այդպես կտրուկ ա՞ճ է գրանցվել, որը բյուջեի 33 տոկոսն է կազմում, որքանո՞վ է նպատակահարմար նման պիկը, չարժե՞ արդյոք բանակցել պարտքի սպասարկման հարցում, որ ավելի սահուն լինի։ Փաշինյանին հետաքրքրում էր՝ հարթ գրաֆիկն ավելի օգտակար չի՞ լինի տնտեսության համար, և կտրուկ վերելքները արդյոք չե՞ն վնասում տնտեսությանը: Պատգամավորը նկատեց՝ պարտքի նման մի պիկ էլ սպասվում է 2020-ին։
Արթուր Ջավադյանը նախ տեղեկացրեց, որ 2009թ. ռուսական 500 մլն դոլար վարկը վերցնելուց հետո ընդունվել է քաղաքական որոշում՝ ռուսական վարկը սպառել 10 տարում։ ԿԲ նախագահը նշեց, որ 500 միլիոնով ավելացավ վարկերի սպասարկումը, իսկ մեծ տատանումը կապված է սպառման համար։ «2019-2020 թթ., իհարկե, որոշակի պիկ ունենք, բայց մեր արտաքին ռեզերվների կառուցվածքը, արտաքին պահուստների կառուցվածքը համահունչ են պարտքի կառուցվածքին՝ թե՛ արտարժույթի տեսակարար կշիռներում, թե՛ ժամկետների հարցում։ Դրանք հաշվի են առնվել, և բոլոր տիպի պիկերը հաշվի ենք առնում»,- ասաց նա, ապա հարցրեց՝ արդյոք ունա՞կ կլինենք մարելու դրանք, և ինքն էլ դրական պատասխան տվեց:
Ջավադյանը տեղեկացրեց, որ 2013-ին եղել է արտաքին ռեզերվների սպասարկման ամենաբարձր մակարդակը, ապա նշեց, որ պատմականորեն արտաքին ռեզերվների ամենաբարձր մակարդակն ունեցել ենք 2012-ին։
Ֆինանսների փոխնախարար, գլխավոր գանձապետ Ատոմ Ջանջուղազյանը հարցին նույնպես անդրադարձավ՝ մեկնաբանելով, որ հարցն ավելի շատ kառավարությանն է վերաբերում, քան ԿԲ-ին։ «Ինչու է այդքան մեծ ստացվել 13-ի պարտքի սպասարկման թիվը: Այն բացատրություն ունի. մենք ստանձնել ենք վաղաժամ մարում, 10 տարվա ընթաքցում պետք է մարել ռուսական վարկը, իսկ մարումն իրականացվել է ի հաշիվ մեկ այլ արտաքին պարտքի, բայց ոչ պարտքի տեսքով, այլ արտաքին շուկայում պետական պարտատոմսերի վաճառքով»,- ասաց նա։ Փաշինյանը տեղից արձագանքեց, թե այդ պատասխանն իրեն հիշեցրեց Պարույր Սևակի «Առաջադրանք բոլոր հաշվիչ մեքենաներին» բանաստեղծությունը, ապա նկատեց, թե Արթուր Ջավադյանի պատասխանն իր համար ավելի հասկանալի էր։
«Հասկացանք, որ կայացվել է քաղաքական որոշում, և արտաքին պարտքի սպասարկման բարդությունները գցվել են 2020-ի վրա։ Ասաց, որ եթե այսպես չանեինք, պիկը կլիներ 14, 15 թվականներին։ Եթե ճիշտ հասկացա, պետությունն առաջնորդվում է «ինձանից հետո թեկուզ ջրհեղեղ» սկզբունքով»,- ասաց նա՝ հավելելով, որ չի կարծում, թե այսօրվա իշխանությունները կլինեն իշխանության ղեկին 2020թ., ու սրանով որոշվել է պարտքը հեռացնել, որ բարդություն չլինի:
ՀՀԿ խմբակցության պատգամավոր Գագիկ Մինասյանն արձագանքեց, թե արվել է ճիշտ հակառակը. պարտքի մարումը ոչ թե հետ են տվել, այլ առաջ, Ջավադյանն էլ նշեց, որ իրենք ոչ թե ավելացրել են բյուջեի բեռը, այլ թեթևացրել են այն, իսկ քաղաքական որոշում ասելով՝ նկատի է ունեցել, որ դրանք ուղղորդվում են տնտեսական որոշումներով։
Լուսանկարը` PAN Photo-ի
