«Դեռ 1995 թվականին կուսակցությունների վեցյակ կազմավորվեց, որոնք նոր Սահմանադրության տարբերակ ներկայացրեցին, որտեղ հստակ գրված էր, որ մենք խորհրդարանական կառավարման համակարգի կողմնակիցներ ենք: Մենք հիմա էլ ենք նույն տեսակետին». սա ՀԴԿ նախագահ Արամ Սարգսյանի հիշեցումն է այն կուսակցություններին, որոնք այս օրերին հանդես են գալիս խորհրդարանական կառավարման համակարգի անցնելու առաջարկներով, որպեսզի վերջիններս չփորձեն դա ներկայացնել իբրև սեփական մտահղացում: «Առավոտ»-ը գրում է, որ այս օրերին այդ մասին առաջարկներ են հնչեցրել ՀՅԴ-ն և ԲՀԿ-ն: 1995-ին ՀՅԴ-ն այդ վեցյակի անդամ էր:
Այսօր հնչող հայտարարություններում Արամ Սարգսյանը «կոնյունկտուրային» երանգ է տեսնում ու հարցեր է հնչեցնում` ինչո՞ւ նախագահական ընտրություններից երեք ամիս առաջ, ինչւպե՞ս ենք դա իրականացնելու` հիմա՞, թե՞ հետո: «Եթե հիմա են խորհրդարանում դա ուզում անել, դա միանշանակ PR կամպանիա է, և ես չեմ էլ ուզում դա քննարկել: Եթե սա լուրջ մոտեցում է, ապա տանենք նախագահական ընտրություններից հետո, որովհետև, միևնույն է, հիմա դուք չեք կարող արագ ընդունել այդ սահմանադրական փոփոխությունները և գնալ նախագահական ընտրությունների, երբ նախագահն իր լիազորությունները կիսով չափ կորցրած կլինի, դրանք վարչապետին կտրվեն: Ծիծաղելի է»,- ասում է թերթի զրուցակիցը:
