Վրաստանում անցկացված խորհրդարանական և նախագահական ընտրություններից առաջ իշխող «Վրացական երազանք»-ը, արդեն գործող նախագահ Գեորգի Մարգվելաշվիլին բազմաթիվ խոստումներ էին տվել փոքրամասնություններին, որոնք մինչ այսօր չեն կատարվել:
Հունիսի 15-ին Վրաստանում, այդ թվում՝ հայաբնակ Ջավախքում, անցկացվելու են ՏԻՄ ընտրություններ, և բնակչությունն արդեն կորցրել է հավատը իշխող կուսակցության, դրա առաջադրած թեկնածուների նկատմամբ:
Բացի այդ, Սաակաշվիլու «Միացյալ ազգային շարժման» անդամները հանուն իշխանության տեղափոխվել են «Վրացական երազանք» և պատրաստվում են այս ընտրություններում ևս առաջադրվել:
«Առաջին լրատվական»-ի հետ զրույցում «Ջավախք» հայրենակցական միության նախագահ, ՀՀԿ-ական պատգամավոր Շիրակ Թորոսյանն ասաց, որ քարոզարշավ են իրականացրել ու խոստումներ տվել, խնդիրներ ձևակերպել, սակայն պարզվեց, որ դրանք միայն կարճաժամկետ քաղաքական գործընթացներ են. «Հետագայում պարզ դարձավ, որ ինչ իշխանություն էլ լինի, Ջավախքում հարց լուծողը անվտանգության ուժերն են: Իշխանությունները կրկին կոտրած տաշտակի առաջ են տանում, այն է՝ մեռցնել քաղաքական պրոցեսը, որպեսզի հասարակական ակտիվիստներ չլինեն ու առաջ քաշեն հասցեավորված ընտրություններ»,- ընդգծեց Թորոսյանը:
Նրա խոսքերով՝ ընտրություններն արդեն ներքին կլանային, խմբակային, ուժային կառույցների կողմից ղեկավարվող գործընթացներ են:
Դիտարկմանը, թե առայժմ գործում են սաակաշվիլիական մեթոդները, որից ինքը բազմիցս դժգոհել է, Շիրակ Թորոսյանն ասաց. «Մենք հույս ունեինք, որ դրանք անցել են, բայց փաստորեն՝ ոչ: Տվյալ դեպքում պետք է խոսենք ոչ թե վերադարձի, այլ մի փոքր պասիվացնելուց հետո նոր ակտիվացման մասին»:
Հիշեցնենք, որ Շիրակ Թորոսյանը Վրաստանի նախկին նախագահ Միխեիլ Սաակաշվիլու օրոք Վրաստանում ճանաչվել էր persona non grata: Հետաքրքրվեցինք, թե գուցե այս նոր իշխանություններին է՞լ քննադատելու համար նման ճակատագրի արժանանա, պատասխանեց. «Ես չեմ ուզում այդ հարցը հիմա քննարկել»:
