Թուրքական Radikal թերթի փոխանցմամբ, Լրագրողների ու հրատարակիչների համաշխարհային ֆեդերացիան (WAN-IFRA) և Խմբագիրների համաշխարհային ֆորումը դատապարտել են Թուրքիայի վարչապետ Էրդողանին` պահանջելով ազատ արձակել ձերբակալված թուրք լրագրողներին:
Նրանք Էրդողանի համար պատրաստել են մի գրություն, որտեղ նշել են, որ իրենք խորապես անհանգստացած են Թուրքիայում 63 լրագրողների ձերբակալություններով, ինչի միակ պատճառը նրանց լրագրողական գործունեությունն է.
«Մարտի 6-ին ձերբակալվեցին թուրք լրագրողներ Ահմեդ Շըքն ու Նեդիմ Շեները, որոնք մեղադրվեցին ահաբեկչական «Էրգենեկոն» կազմակերպության անդամ հանդիսանալու և ժողովրդի շրջանում «ատելություն ու թշնամություն սերմանելու» մեջ: Եվ չնայած թուրքական դատարանը չհաստատեց նրանց մեղքը, այնուամենայնիվ, նրանք ուղարկվեցին Ստամբուլի բանտ»:
Նշվում է, որ WAN-IFRA-ն աշխարհի ավելի քան 120 երկրներում ներկայացնում է 18.000 հրատարակչություն, 15.000 ինտերնետային կայք և 3000-ից ավելի կազմակերպություն:
Հիշեցնենք, որ երկու օր առաջ ամերիկյան հեղինակավոր The New York Times թերթը գրեց, որ Նեդիմ Շեները հանդիսանում է Թուրքիայի առաջատար հետաքննիչ լրագրողը, ով առավել վաղ նույնպես ենթարկվել է հետապնդումների` թուրքական կառավարության դեմ դուրս եկած և 2007 թվականի հունվարի 19-ին սպանված հայազգի լրագրող Հրանտ Դինքի գործը հետաքննելու համար:
Ի դեպ, Շեները հանդիսանում է «Դինքի սպանությունն ու հետախուզության ստերը» և «Կարմիր ուրբաթ. ո՞վ կոտրեց Դինքի գրիչը» գրքերի հեղինակը: