ԱՄՆ 113-րդ Կոնգրեսում, որը մասամբ ընտրվել է նոյեմբերի 6-ին, ընդգրկվել են Կոնգրեսի ձևավորման պահից՝ 1789 թվականից ի վեր ռեկորդային թվով կանայք: Նրանք 20-ն են: Այս մասին հաղորդում է Politico-ն:
Այսպիսով՝ սկսած 2013-ի հունվարից, յուրաքանչյուր 5-րդ սենատոր կին կլինի: Անցկացված քվեարկությամբ երկպալատ Կոնգրեսում ընտրվել են Ներկայացուցիչների պալատի բոլոր անդամներն ու սենատորների 1/3-ը:
Ընտրությունների արդյունքներով՝ Դեմոկրատական կուսակցությունից Կոնգրեսի վերին պալատ են անցել Թեմի Բոլդուինը (Վիսկոնսին), Հայդի Հայթքամփը (Հյուսիսային Դակոտա), Մազի Հիրոնոն (Հավայի) և Էլիզաբեթ Ուորենը (Մասաչուսեթս):
Հանրապետական կուսակցությունից նոր սենատոր է դարձել Դեբ Ֆիշերը (Նեբրասկա): Գործող 6 կին դեմոկրատ սենատորներ նոյեմբերի 6-ին վերընտրվել են: 4 նահանգներում՝ Կալիֆոռնիայում, Վաշինգտոնում, Մենում և Նյու Հեմփշիրում երկու սենատորներն էլ կլինեն իգական սեռի ներկայացուցիչներ:
2012 թվականին Սենատում կանանց թիվը 17-ն է եղել (սենատորների ընդհանուր թիվը 100-ն է): Այն պահից, երբ ձևավորվել է Կոնգրեսը, այնտեղ ներկայացված են եղել 39 կանայք: Առաջին կին սենատորը (1922թ.) եղել է գրող և քաղաքական գործիչ Ռեբեկա Լաթիմեր Ֆելթոնը, որը 87 տարեկանում նշանակվել է Ջորջիայի նահանգապետ: Մինչ օրս նա մնում է Ջորջիա նահանգից Սենատում ներկայացված միակ կինը:
2012-ի նոյեմբերի 6-ի ընտրությունների արդյունքներով դեմոկրատները ընդլայնել են ներկայացուցչությունը Սենատում՝ 53 աթոռ ընդդեմ հանրապետականների 45-ի, ևս երկու տեղ զբաղեցրել են անկախ թեկնածուները: Հանրապետականներն էլ մեծամասնություն են պահպանել 435 տեղանոց Ներկայացուցիչների պալատում: Ներկայում նրանք զբաղեցնում են 233 տեղ, իսկ դեմոկրատները՝ 192:
