ՀՀ բնապահպանության նախարար Արամ Հարությունյանի նախաձեռնությամբ՝ նոյեմբերի 5-ին «Խոսրովի անտառ» պետական արգելոցի «Խոսրովի» տեղամասի այցելուների կենտրոնում կազմակերպվեց խորհրդակցություն` ոլորտին աջակցող միջազգային կազմակերպությունների, ԳԱԱ ոլորտային ինստիտուտների, բուհերի ներկայացուցիչների հետ:
Ինչպես ավելի վաղ տեղեկացրել էին ՀՀ ԲՆ հասարակայնության հետ կապի և լրատվության բաժնից, բնապահպանության նախարարությունը խորհրդակցության օրակարգում ընդգրկել է պահպանվող տարածքների մասին օրենսդրության բարելավման, արգելոցի պահպանման ռեժիմն իրականացնող աշխատակազմի մասնագիտական վերապատրաստման և տեխնիկական վերազինման, ֆինանսական միջոցների համալրման և արդյունավետ օգտագործման, կադրային համալրման, համայնքային իրազեկման, անվտանգ էկոտուրիզմի զարգացման հետ կապված հարցեր: Օրակարգային էին նաև «Խոսրովի անտառ» պետական արգելոց մուտքի էլեկտրոնային թույլտվություններ ստանալու կարգի մշակման, արգելոցի վարչական սահմաններին տեսախցիկների տեղադրման և էկոպարեկային խմբերի ստեղծման աշխատանքների կարգի մշակման և այլ հարցեր: Չհրավիրված բնապահպան ակտիվիստներին դժվարությամբ, բայց հաջողվեց մասնակցել խորհրդակցությանը:
«Առաջին լրատվական»-ի հետ զրույցում բնապահպան-ակտիվիստ Մարիամ Սուխուդյանը, ով մասնակցել էր քննարկմանը, նկատեց, որ քննարկման ժամանակ իրենց առաջարկները չէին լսում, ավելին՝ տպավորություն էր, որ ակտիվիստների ներկայությունից բնապահպանության նախարար Արամ Հարությունյանը լարված էր ու կաշկանդված, քանի որ բնապահպանները լսում էին, թե ինչ ստեր էր ասում այն մասին, թե ինչ է արվում «Խոսրովի անտառ»-ում և ինչ լավ է արվում: Մ. Սուխուդյանի խոսքերով՝ խորհրդակցությունն ավելի շատ ֆինանսական խնդիրներին էր առնչվում՝ նոր ֆինանսական հոսքեր, նոր գրանտեր, նոր փողեր լվանալու ինչ-որ հարցեր էին քննարկվում:
«Իսկ մենք բարձրաձայնում էինք, որ նախարարն իր տեղում չէ և չի կարողանում առաջացած խնդիրները լուծել: Սկսենք նրանից, որ տեղում կոծկում է հանցագործությունը:
Ինչպե՞ս իրեն պահեց նախարարը Խոսրովի անտառում որսագողության դեպքից հետո: Հեռացրեց աշխատանքից «Խոսրովի անտառ» պետական արգելոցի արդեն իսկ հեռացված տնօրեն Վորոնցովին: Հանրության աչքին թոզ փչելու համար մամուլով հայտարարեց, թե տնօրենին հեռացրել է այն ժամանակ, երբ ժամանակավոր պաշտոնակատարն արդեն իսկ ներկայացված էր, իսկ անունը՝ հայտնի:
Բազմաթիվ խնդիրներ թողած՝ նոր նախագծերից են խոսում, նոր ծրագրերից՝ ինչպե՞ս վերահսկեն, ինչպե՞ս աշխատավարձ բարձրացնեն և այլն: Հասկանում եմ, որ անտառապահները նվազագույն աշխատավարձ են ստանում, բայց կարելի է նրանց մեկ անգամ հարցնել, թե աշխատավարձը 40 հազարից 100 հազար դարձնելու դեպքում օլիգարխից պաշտպանելո՞ւ են արգելոցը, թե ոչ»,- նշեց Մարիամ Սուխուդյանը: Նա նաև պատմեց, որ քննարկման օրն իրեն էր մոտեցել Կատյա անունով ՄԱԿ-ի ներկայացուցիչ մի կին և հարցրել, թե ի՞նչ է կատարվում իրականում, ինչո՞ւ են ակտիվիստները փակել ավտոբուսի ճանապարհը, ո՞րն է նրանց պահանջը: « Մանրամասն պատմեցի արգելոցում տիրող բարձիթողի վիճակի, ապօրինի շինության և այն մասին, որ մեզ` շահագրգիռ, մտահոգ քաղաքացիներիս անտեսել են, չեն ներգրավվել քննարկմանը: Այս ամենից հետո ՄԱԿ-ի ներկայացուցիչները, որոնք եկել էին մասնակցելու քննարկմանը, գնացին՝ ներկա չգտնվելով քննարկմանը»,- ասաց Մարիամ Սուխուդյանը:
Բնապահպան ակտիվիստը նաև ընդգծեց, որ խորհրդակցությունը չանցկացվեց նախապես նշված օրակարգի համաձայն: Ըստ նրա՝ քննարկման օրակարգում էր «Խոսրովի անտառ» պետական արգելոցի տնօրեն ընտրելու հարցը, որը չքննարկվեց: «Ըստ շրջանառվող լուրերի՝ տնօրենի թեկնածու է Նոնո մականունով, կենդանիներ խոշտանգող մի որսագող, որի միջոցով կփորձեն ավելի լեգիտիմացնել այդ որսը: Մեզ անհանգստացնում է՝ ով ուզում է՝ կարող է դառնալ արգելոցի տնօրեն, չկա՞ն ինչ-որ չափանիշներ: Նախարարության ներկայացուցիչներն, իհարկե, այդ հարցերը չեն ցանկանա քննարկել մեզ հետ»,- կարծիք հայտնեց բնապահպանը:
Անդրադառնալով «Խոսրովի անտառ» պետական արգելոցի «Գառնի» տեղամասում կառուցվող շինությանը և դրա շուրջ խոսակցություններին՝ Սուխուդյանն ասաց, որ այն գիտական կենտրոն չէ, այլ ռեստորանային համալիր, որն «էկոտուրիզմ» հիմնավորմամբ ամեն կերպ փորձում են պահել: Հիշեցնելով այս շինության պատմությունը՝ բնապահպանն ասաց, որ երկու տարի առաջ Խոսրովի արգելոցի տարածքից առանց որևէ հիմնավորման առանձնացրել էին մոտ 200 հա տարածք ու այդ տարածքի ռեժիմային ստատուսը թուլացրել էին՝ դարձնելով արգելավայր, որտեղ կառուցապատում թույլ է տրվում:
« Աղմուկ բարձրացրեցինք, կանգնեցրեցին շինարարությունն ու կառավարության անհեթեթ որոշումը ետ կանչվեց, արդյունքում տարածքը նորից վերադարձվեց արգելոցային ռեժիմին, բայց շենքը մնաց: Դրանից ենթադրում եմ, որ ամեն կերպ փորձում են լեգիտիմացնել այդ շենքը: Այս հարցը կարգավորելու համար բնապահպանության նախարարությունից մինչև սեպտեմբեր ժամանակ էին խնդրել: Անցավ սեպտեմբերը՝ նորից ժամանակ խնդրեցին այդ ապօրինի շինության հարցը լուծելու համար»,- ասաց Մարիամ Սուխուդյանը: Նրա վստահեցմամբ՝ այս խնդիրը իրենք՝ ակտիվսիտները, կփորձեն քաղաքացիական դատարանի միջոցով լուծել, ինչպես դա արեցին Մաշտոցի պուրակում. հիմնեցին քաղաքացիական արդար դատարան, որը որոշում կայացրեց, որից հետո ապամոնտաժումն իրականացավ:
«Մեր քաղաքացիական խմբի ներկայացուցիչների համոզմամբ՝ եթե ճնշումներ չլինեն,«գիտական կենտրոն» անվան տակ կլեգիտիմացնեն ռեստորանային համալիրը»,- նկատեց Մարիամ Սուխուդյանը:
Եզրափակելով իր խոսքը՝ նա ասաց, որ հետևողական են բնապահպանության նախարար Արամ Հարությունյանի քրեական պատասխանատվության, հրաժարականի պահանջի հարցում և կազմակերպված քայլերով են շարժվելու այս նպատակների ուղղությամբ:
