Հայաստանն այս տարի ևս, արդեն 6-րդ անգամ, կմասնակցի Վենետիկի 14-րդ միջազգային ճարտարապետական բիենալեին, որն այս տարի անցկացվում է «Հիմքեր» խորագրի ներքո և ընդգրկում է 1914-2014թթ. համաշխարհային պատմության ու քաղաքաշինության պատմությունը:
Հայկական տաղավարը տեղակայվելու է Վենետիկի նախկին Մուրադ-Ռափայելյան վարժարանի շենքում 200 քմ-ի վրա, ունենալու է երկու հարկ: «Իղձերի մայրաքաղաք» խորագիրը կրող Հայաստանի ազգային տաղավարը համադրելու գործը այս տարի վստահվել է Ռուբեն Արևշատյանին ու Գեորգ Շյոլհամերին:
Ինչպես տեղեկացրեց Ռուբեն Արևշատյանը, հայաստանը բիենալեին կներկայացնի մոտ 250 մշակութային օբյեկտ, ըստ էության բիենալեում անկախ Հայաստանի ճարտարապետությունը ներկայացված չէ: Այս տարի որոշվել է անդրադառնալ ոչ թե ճարտարապետներին, այլ ճարտարապետությանը՝ նպատակ ունենալով ցույց տալ ճարատարապետության մեջ առկա ճգնաժամը:
«Ցավոք, ճարտարապետության մեջ ապրում ենք մեծ ճգնաժամ, ճարտարապետության հզոր մի ալիք, երբ օգտվում ենք արդի ժամանակաշրջանի ձևավորած մշակութային կառույցներից»,- ասաց բանախոսը:
Հետազոտությունն սկսվել է 1923-ից՝ Երևանի գլխավոր հատակագծից, և նախագծային առումով ավարտվել 1986-ին: Վերջին շենքը Ջիմ Թորոսյանի հեղինակած Երևանի քաղաքապետարանի շենքն է, որն այդ ժամանակ նախագծման փուլում էր:
Աշխատանքը կազմակերպելիս համադրողները ուշադրությունը կենտրոնացել են հայկական արդի ճարտարապետության 3 հիմնական փուլերի վրա՝ լեզվական, ոճային, առանցքային: Առաջինը թամանյանական ոճն է, մյուսը՝ կոնստրուկտիվիստական, իսկ երրորդ ուղղությունը՝ Երկրորդ համաշխարհային պատերազմից հետո ստեղծված՝ Ռաֆայել Իսրայելյանի առաջ քաշած 2-րդ ազգային դպրոցի մոտեցումը:
Ռ Արևշատյանի խոսքով՝ բացի ցուցանմուշներից՝ այս տարի կկիրառվեն նաև ցուցադրության ժամանակակից մեթոդներ՝ տեսալսողական, ցուցադրական, կցուցադրվեն նաև հատվածներ ֆիլմերից, որունցում կարտացոլվի 1960-ականների Երևանը, կներկայացվեն հայ ճարտարապետների՝ Թամանյան, Մազմանյան, Իսրայելյան, Հալաբյան, Երկանյան, Քոչար, Խաչիկյան, Պողոսյան, Թարխանյան, աշխատանքները:
Վենետիկի միջազգային բիենալեն համադրում է հոլանդացի հայտնի ճարտարապետ Ռեմ Կուլհասը:
Միջազգային բիենալեում հայկական տաղավարը կբացվի հունիսի 6-ին, իսկ հանրության առաջ այն իր դռները կբացի հունիսի 7-ից և կգործի մինչև նոյեմբերի 23-ը:
