Միսիսիպի նահանգի Օքսֆորդ քաղաքի համալսարանի հարյուրավոր ուսանողներ բողոքի ակցիա են անցկացնում ԱՄՆ նախագահի պաշտոնում Բարաք Օբամայի վերընտրվելու դեմ: Ցուցարարները բացականչում են ռասիստական կարգախոսներ: Այս մասին հայտնում է Associated Press-ը:
Համալսարանում բողոքի ակցիան սկսել էին մի քանի տասնյակ ուսանողներ, սակայն չորեքշաբթի երեկոյան արդեն նրանց միացած ցուցարարների թիվը անցել էր 400-ից: Նրանցից առնվազն երկուսը ձերբակալվել են ոստիկանության կողմից: Գործակալության փոխանցմամբ՝ ակցիային մասնակցության կոչերը տարածվել էին Twitter միկրոբլոգների ծառայության միջոցով:
Համալսարանի ռեկոտոր Դեն Ջոնսը դատապարտել է ուսանողական բողոքի ակցիան՝ամոթանք տալով ուսանողներին ռասիստական ենթատեքստով ակցիաներին մասնակցելու համար:
Ինչպես գրում է գործակալությունը, ավելի քան 50 տարի առաջ այս համալսարանի պատերի ներքո արդեն անցկացվել է ռասիստական ակցիա: Այն ժամանակ ուսանողները բողոքում էին սևամորթ դիմորդ Ջեյմս Մերեդիտին բուհ ընդունելու դեմ: