Ռուսաստանն ահաբեկչության մեղսակից երկիր ճանաչելու խնդրագիրը Սպիտակ տան կայքում մինչև երեքշաբթի օրվա երեկո հավաքել է ավելի քան 102 000 ձայն:
Հիշեցնենք՝ որպեսզի խնդրագիրն ուղարկվի ԱՄՆ վարչակազմի քննարկմանը, այն պետք է հավաքի 25 000 ստորագրություն: Եթե ուղերձին մեկ ամսում կողմ կարտահայտվի առնվազն 100 000 մարդ, ԱՄՆ համապատասխան պետական կառուցվածքը պարտավոր է քննարկել այն և պաշտոնական պատասխան տալ (միևնույն ժամանակ, սա չի նշանակում, որ ԱՄՆ իշխանությունները պարտավոր են կատարել խնդրագրում նշված պահանջները):
Դիմումի տեքստում, մասնավորապես, նշված է. «Ուկրաինայի դեմ չհայտարարված պատերազմում Ռուսաստանն ապավինում է գաղտնի գործողություններին, որոնք ընկնում են «միջազգային ահաբեկչություն» սահմանման տակ: Մասնավորապես, ռուս զինված ուժայինները, որոնք ծածուկ են աշխատում, փորձում են վախեցնելու կամ ստիպելու ճանապարհով ազդել ուկրաինական իշխանությունների քաղաքականության վրա, նաև՝ առևանգելով և սպանելով մարդկանց, գրավելով կառավարական շենքեր, ոստիկանական բաժանմունքներ և ուկրաինական ռազմաբազաներ: Այդ գործողությունները մասշտաբային բնույթ ունեն և տարվում են տևական ժամանակ՝ չնայած ԱՄՆ-ի, «Մեծ յոթնյակի», ՆԱՏՕ-ի, ԵՄ-ի և ՄԱԿ-ի քննադատություններին»:
