Այսօր վերաքննիչ քրեական դատարանը Արմեն Դանիելյանի նախագահությամբ հրապարակեց Քրիստինե Ներսիսյանի գործով կայացրած որոշումը:
Քրիստինե Ներսիսյանը մեղադրվում էր Ռաֆիկ Մարկոսյանի հետ նախնական համաձայնությամբ թրաֆիքինգ կատարելու՝ անչափահաս աղջկան՝ Աստղիկին, աշխատանքային շահագործման ենթարկելու նպատակով ՌԴ տանելու, 2011 թվականի հուլիսի 12-28-ը Մինվոդիից ոչ հեռու գտնվող գյուղում ստիպողաբար պահելու և բռնի աշխատեցնելու համար:
Նախաքննական մարմինը Ներսիսյանին մեղադրանք էր առաջադրել Աստղիկի ընկերուհուն՝ անչափահաս Էլենին ևս նույն նպատակով ՌԴ տանելու փորձ կատարելու համար: Ըստ մեղադրանքի՝ Էլենին ՌԴ մեկնելու առաջարկ արել էր Ռաֆիկը, բայց Էլենը մերժել էր առաջարկը: Քրիստինեն, լինելով Ռաֆիկի սիրուհին, նրա կողմից աղջիկներին ներկայացվել էր որպես մորաքրոջ աղջիկ: Այդպես էր նա ներկայացել նաև Ռուսաստանում՝ իրենց բնակության վայրի հարևանությամբ ապրողներին:
Շենգավիթ վարչական շրջանի ընդհանուր իրավասության առաջին ատյանի դատարանը Ալեքսանդր Ազարյանի նախագահությամբ Քրիստինե Ներսիսյանին մեղավոր էր ճանաչել միայն Աստղիկին աշխատանքային շահագործման ենթարկելու համար, Էլենի մասով Ներսիսյանն անպարտ էր ճանաչվել: Անչափահաս աղջկան թրաֆիքինգի ենթարկելու համար Քրիստինե Ներսիսյանը դատապարտվել էր 11 տարի ազատազրկման:
Դատավճիռը բողոքարկել էին ամբաստանյալի պաշտպանական կողմը և մեղադրողը: Առաջինը միջնորդել էր Ներսիսյանին անպարտ ճանաչել նաև Աստղիկի մասով կամ, մեղավոր ճանաչելու դեպքում, մեղմացնել պատիժը, իսկ մեղադրանքի կողմը միջնորդել էր Ներսիսյանին մեղավոր ճանաչել նաև Էլենի մասով:
Այսօր վերաքննիչ քրեական դատարանում Քրիստինե Ներսիսյանի շահերի պաշտպան Ռաֆիկ Սաֆարյանը մի քանի միջնորդություններ արեց: Դատարանը որոշեց այդ միջնորդություններին անդրադառնալ խորհրդակցական սենյակում:
Խորհրդակցական սենյակից դուրս գալով՝ դատարանը հրապարակեց կայացրած որոշումը. վերաքննիչ բողոքները մերժվեցին, Շենգավիթ վարչական շրջանի ընդհանուր իրավասության դատարանի դատավճիռը գնահատվեց որպես հիմնավոր և օրինավոր ու թողնվեց անփոփոխ: Ասել կուզի՝ Քրիստինե Ներսիսյանը դատապարտված է 11 տարի ազատազրկման:
Քանի որ Քրիստինե Ներսիսյանի հանցընկերը համարվող Ռաֆիկ Մարկոսյանն ավելի ուշ էր հայտնաբերվել, նրա մասով գործի դատական քննությունն այժմ դեռ ընթանում է նույն վարչական շրջանի ընդհանուր իրավասության առաջին ատյանի նույն դատարանում և նույն դատավորի նախագահությամբ: Եթե Քրիստինե Ներսիսյանն արդեն դատական երկու ատյանով մեղավոր է ճանաչվել Ռաֆիկ Մարկոսյանի հետ նախնական համաձայնությամբ անչափահաս աղջկա նկատմամբ թրաֆիքինգ կատարելու համար, ապա Ռաֆիկ Մարկոսյանի գործի դատական ելքը միգուցե կարելի է և կանխատեսելի համարել:
