WikiLeaks-ը դժգոհ է մնացել, որ ամերիկացի լրագրողները չեն հրապարակել այն երկրի անունը, որի քաղաքացիներին լրտեսել են ԱՄՆ հատուկ ծառայությունները: Կազմակերպությունն արդեն հայտարարել է, որ մտադիր են անել դա՝ չնայած նախազգուշացումներին, որ այդպիսի քայլը կարող է հանգեցնել «բռնության աճի» և մարդկանց մահվան: Այս մասին հայտնում է RT կայքը:
Խոսքը նոր գաղտնի տվյալների հրապարակման մասին է, որոնք ստացվել են ԱՄՆ հատուկ ծառայությունների նախկին աշխատակից Էդվարդ Սնոուդենից:
WikiLeaks-ի դժգոհությունը հարուցել է մայիսի 19-ին The Intercept պարբերականում լույս տեսած հրապարակումը, որը ստեղծվել է հատուկ Էդվարդ Սնոուդենից ստացված տվյալների հրապարակման համար: WikiLeaks-ը հուսախաբ է եղել նրանից, որ պարբերականը չի հրապարակել ևս մեկ երկրի անունը, որի քաղաքացիներին ամբողջությամբ լրտեսել են:
Ըստ The Intercept-ի հրապարակման՝ Ազգային անվտանգության գործակալությունը SOMALGET ծածկագրային անվանումը կրող ծրագրի շրջանակներում գաղտնալսել է «օրական ավելի քան 100 մլն հեռախոսազանգ» Բահամյան կղզիներում և երկրորդ պետությունում, որի անունը լրագրողները չեն հրապարակել՝ դա բացատրելով այսպես. «Հիմնավոր անհանգստություն կա, որ այդպիսի քայլը կարող է հանգեցնել բռնության աճի»: Մեկ այլ՝ MYSTIC ծրագրի շրջանակներում Միացյալ Նահանգները տվյալներ է հավաքել առնվազն 5 երկրի բնակիչների զանգերի վերաբերյալ:
WikiLeaks-ը պարբերականին մեղադրել է ստացված տվյալները գրաքննության ենթարկելու մեջ: Կազմակերպության կարծիքով՝ լրագրողները երկրի բնակիչներին զրկել են իրենց լրտեսելու մասին իմանալու իրավունքից: WikiLeaks-ը հայտարարել է, որ խմբագիրները չէ, որ պետք է սա որոշեն, և խոստացել է 72 ժամվա ընթացքում հրապարակել երկրի անունը՝ չնայած նշված մտավախություններին:
Հիշեցնենք՝ Ամերիկյան հատուկ ծառայությունների գաղտնալսման մասին նյութերն առաջինը հրապարակել էին The Guardian-ը և The Washington Post-ը: Նրանց տվյալներ էր տրամադրել ԱՄՆ հատուկ ծառայությունների նախկին աշխատակից Էդվարդ Սնոուդենը:
Սնոուդենը խոսեց ոչ միայն աշխարհի շատ երկրների պետությունների ղեկավարների ու նախարարների, այլև սովորական քաղաքացիների հեռախոսային խոսակցությունների մասշտաբային գաղտնալսման մասին:
