Լոս Անջելեսում ձերբակալվել է դերասան Մայքլ Ջեյսն իր կնոջը՝ Էյփրիլ Ջեյսին, սպանելու կասկածանքով: Ոստիկանության տվյալներով՝ 48-ամյա դերասանն անձամբ է զանգահարել 911 հեռախոսահամարին և օպերատորին հայտնել, որ կրակել է իր կնոջը: Այս մասին փոխանցում է BBC-ն:
Դեպքի վայր ժամանած ոստիկանները հայտնաբերել են 40-ամյա Ջեյսի դին իրենց տան միջանցքում: Հայտնաբերվել է նաև ատրճանակ, որը ենթադրաբար պատկանել է դերասանին:
Սպանության պատճառները դեռևս հայտնի չեն:
Քննիչներն այժմ փորձում են պարզել՝ զույգը ունեցե՞լ է ընտանեկան կամ ֆինանսական խնդիրներ:
Դատարանը Ջեյսի ազատ արձակման համար սահմանել է 1 մլն դոլարի գրավ, որը դեռևս չի վճարվել, այդ իսկ պատճառով դերասանը գտնվում է կալանքի տակ:
Մայքլ Ջեյսը հայտնի է հանրահայտ «Վահան» հեռուստասերիալից, որում նա հանդես է գալիս ոստիկանի դերով:
