«Սահմանադրական բարեփոխումների հայեցակարգում ընդհամենը մնացել են երկու հիմնական հարցերի շուրջ տարբեր մոտեցումներ, որոնց առնչությամբ ևս մոտեցումները էապես չեն տարբերվում: Խոսքը երկրի կառավարման ձևի փոփոխմանն է վերաբերում, և մյուսը՝ դատական ատյանների քանակի հետ կապված»,- այսօր Սահմանադրական բարեփոխումների հայեցակարգի հանրային քննարկման ժամանակ «Առաջին լրատվական»-ի հետ զրույցում ասաց արդարադատության նախկին նախարար, Սահմանադրական բարեփոխումների հանձնաժողովի անդամ Գևորգ Դանիելյանը:
Նրա խոսքով՝ իրենք դեռևս չեն կողմնորոշվում, թե վիճահարույց ինստիտուտների ներդրման հարցում ինչպես մոտեցում ընտրել, և հանրային քննարկումները կվերացնեն այդ անորոշությունը:
«Կառավարման ձևի հարցում քննարկումների շրջանակների հարցում մենք ավելի շատ շեշտադրում ենք անում քաղաքական ուժերի վրա: Սա այն հարցն է, որն ունենալով իրավական ենթատեքստ՝ ունի նաև քաղաքական ուղղվածություն, որը մենք չենք կարող անտեսել: Մենք փորձում ենք համարժեքորեն հաշվի առնել քաղաքական ուժերի դիրքորոշումը և ներկայացնել հանրության դատին»,-հավելեց Դանիելյանը:
«Առաջին լրատվական»,-ը Դանիելյանից հետաքրքրվեց՝ հնարավո՞ր է կառավարման ձևի փոփոխման հարցում վերջնական կարծիք հայտնելուց իրենք կաշկանդված լինեն Սերժ Սարգսյանի այն մոտեցմամբ, որ ինքը դեմ է խորհրդարանական կառավարման համակարգին: «Ես չեմ կարծում, որ նախագահը միանշանակ մոտեցում հայտնեց: Նա ևս ասաց, որ այս պահին ինքը նախընտրում է քաղաքական կառավարման այն ձևը, որն ամրագրված է Սահմանադրությամբ: Բայց միաժամանակ նա նպատակահարմար համարեց, որ խնդիրը համակողմանի վերլուծվի և քննարկվի: Կարծում եմ՝ եթե չլիներ դրա անհրաժեշտությունը, մենք հազիվ թե սա նախաձեռնեինք»,-ասաց Դանիելյանը: