Թուրքական Anadolu գործակալության փոխանցմամբ, պետնախարար և փոխվարչապետ Բյուլենթ Արընչը Ստամբուլում կայացած «Փոփոխությունների օգտին հանդես եկող առաջնորդների» գագաթաժողովի երկրորդ օրվա «Մենք բոլորս միմյանց կարիքն ունենք. քաղաքական և տնտեսական համագործակցություն» խորագրով նիստում անդրադարձ է կատարել նաև հայ-թուրքական հարաբերությունների կարգավորմանը.
«Մենք Հայաստանի հետ խնդիրներ ունենք: Մենք աշխատում ենք լուծել այդ խնդիրները, մենք պարտավոր ենք լուծել դրանք: Հայաստանը մեզ համար հետևյալ նշանակությունն ունի. անցյալում այս հողերում հայեր են ապրել, ընդ որում` շատ հայեր են ապրել: Կառավարություններում հայ նախարարներ են եղել, եղել են նաև հայ երաժիշտներ, ինչպես նաև մեր պալատները կառուցած հայ ճարտարապետներ: Նրանք այս երկրի հարստությունն էին: Նրանք հեռացան, և մենք կորցրինք մեր հարստությունը: Այդ պատճառով էլ մենք չենք պայքարում Հայաստանի դեմ:
Ես կարծում եմ, որ նրանք առավել մեղավոր են, քան մենք, այնուամենայնիվ, անհրաժեշտ է, որ երկու հարևան երկրները միմյանց դեմ չպայքարեն: Այս պլանում մենք գործադրելու ենք մեզանից կախված ամեն ջանք և աշխատելու ենք կարգավորել այդ երկրի հետ մեր հարաբերությունները»:
Հիշեցնենք, որ 2010 թվականի նոյեմբերի կեսերին Ստամբուլի հայկական «Ժամանակ» թերթին տված հարցազրույցում Թուրքիայի վարչապետ Էրդողանը նշել էր, թե ինքը Թուրքիայի հայ համայնքին համարում է իր երկրի արժեքավոր հարստությունը։
Իսկ ահա այս տարվա հունվարի կեսերին թուրք լրագրող Ջենգիզ Չանդարն իր «Եթե հայերը չլինեին, Ստամբուլն արդյո՞ք կլիներ» հոդվածում գրել էր, որ հայերը մեծագույն ավանդ են ունեցել Ստամբուլի և ընդհանրապես Թուրքիայի կյանքում.
«Մենք բոլորս պետք է մտածենք, թե ինչպես 1915 թվականից հետո մեր երկիրն սկսեց անապատանալ: Բոլոր սպանությունները, կոչվի դա «ցեղասպանություն», «զուլում» կամ «պատմության կեղծիք», անդառնալի հարված էր մեր երկրին և խորը մտածելու առիթ է տալիս»:
