Ռուսական կողմը կփորձի քայլեր կատարել աբխազական երկաթուղու բացման ուղղությամբ, եթե տեսնի, որ վրացիների առաջարկածն իրոք լուրջ տնտեսական ծրագիր է և չունի քաղաքական ենթատեքստ: Այսօր լրագրողների հետ հանդիպմանը նման կարծիք հայտնեց վրացագետ Ջոնի Մելիքյանը:
Նրա խոսքով՝ նույնիսկ եթե միայն բեռնափոխադրում կատարվի երկաթուղով, ռուսական կողմը կհամաձայնի. «Իրենք կգնան այդ քայլին, բայց պետք է հասկանան, թե ինչ իրավիճակ է Վրաստանում: Այս իրավիճակում հարցն անպատասխան կթողնեն՝ փորձելով տեսնել, թե ինչ է կատարվում Վրաստանի ներքին քաղաքական կյանքում»:
Վրացագետը նշեց, որ Վրաստանի վերաինտեգրացիայի հարցերով նոր նախարար Պաատա Զաքարեիշվիլին առաջադեմ գաղափարների կրող է, որի խոսքով` Աբխազիայի և Հարավային Օսիայի անձնագրերը կարող են ճանաչվել Վրաստանում:
Դա, ըստ մասնագետի, դե ֆակտո կհանգեցնի նրան, որ Վրաստանը կճանաչի Աբխազիայի և Հարավային Օսիայի անկախությունը: Վրացագետը կարծում է, որ խնդիրներ կարող են ծագել աբխազների կողմից, քանի որ այդ ազգի մոտ Վրաստանի տիրապետության տակ վերադառնալու ֆոբիա կա:
Քաղաքագետ Լևոն Շիրինյանն էլ կարծում է, որ նախկին վիճակին վերադարձ չի լինի. սա միջուկային տերության խոսքն է: «Աբխազիայի և Օսիայի վերաբերյալ խոսակցություն չի կարող լինել»,- ասաց նա: Վրաստանը գնում է երկաթուղու վերաբացման, քանի որ տնտեսական զարգացման ռեզերվ չունի:
Լևոն Շիրինյանը հիշեց, թե ինչպես Սաակաշվիլիի կառավարման տարիներին Վրաստանը փորձեց իր ավանդական արտադրանքով մտնել արևմտյան շուկա, բայց չստացվեց: Հետևաբար այսօր այդ երկիրը փորձում է Ռուսաստանի հետ վերականգնել տնտեսական կապերը: Սակայն, ըստ քաղաքագետի, Կրեմլում այդքան էլ միամիտ չեն. ճիշտ կլինի, եթե Վրաստանը երկաթուղու գործարկումը քաղաքական դաշտ չմտցնի, հակառակ դեպքում կձախողվի:
«Վրաստանը Արևմուտքին հետաքրքիր էր հակառուսական քաղաքականության իմաստով: Հիմա` եթե Ռուսաստանի հետ նման գործարքի են գնում, այդ գործառույթը կորչում է: Այսինքն ՝ դոլարի հոսքը դադարում է: Եթե երկաթգծի վերաբացման նախաձեռնությամբ են հանդես գալիս, նշանակում է` դոլարի հոսքն արդեն դադարել է, հետևաբար փրկության եզրերը Ռուսաստանում են գտնում, այլապես այդ բազմազգ երկիրը նորից կարող է գնալ քաղաքացիական կռիվների ու պառակտումների ճանապարհով»,- ասաց նա:
Հայկական կողմին Լևոն Շիրինյանը խորհուրդ է տալիս այս հարցում զգացմունքային չլինել, այլ լինել պահանջատեր: «Մեզ պետք է մի քիչ անգլիացի լինել՝ մեկ տարի, երկու տարի, լավ հաշվարկել, զգացմունքի վրա չխաղալ, և ես վստահ եմ, որ երկաթուղին կբացվի: Մենք շրջափակման մեջ գտնվելու իրավունք չունենք: Էդ երկաթուղին իրենք չեն կառուցել ժամանակին, դա ցարական Ռուսաստանի կառուցած երկաթուղին է, որի մեջ մենք ունենք մեծ փայ»,- ընդգծեց քաղաքագետը:
