Ռուսական Regnum լրատվական գործակալության փոխանցմամբ՝ ԱՄՆ պետդեպարտամենտը հայտարարել է, թե տեղյակ չի եղել, որ Ադրբեջանի իշխանություններն այդ երկրում ԱՄՆ դեսպան Ռիչարդ Մորնինգսթարին թույլ չեն տվել այցելել Ջուղայի (Նախիջևան) հայկական գերեզմանոց:
Ոչ վաղ անցյալում կատարած իր նախիջևանյան այցից հետո Մորնինգսթարն ափսոսանք էր հայտնել, որ Ադրբեջանի պաշտոնատար անձինք, ելնելով «անվտանգության նկատառումներից», հնարավոր չէին համարել իր այցը Ջուղայի հայկական գերեզմանոց:
Այս կապակցությամբ լրագրողները հարցրել էին ԱՄՆ պետդեպարտամենտի պաշտոնական ներկայացուցիչ Վիկտորյա Նուլանդին, թե արդյոք պետդեպարտամենտը Բաքվից պարզաբանումնե՞ր է ստացել՝ կապված այդ քայլի հետ: Ի պատասխան՝ Նուլանդն անկեղծորեն պատասխանել է, որ ընդհանրապես տեղյակ չի եղել այդ միջադեպի մասին:
Նա հավելել է, որ այլ երկրներում պատահում են դեպքեր, երբ հանգամանքների բերումով (անվտանգության նկատառումներից ելնելով) սահմանափակում են ամերիկյան դեսպանների ազատ տեղաշարժը:
