Վրաստանի Դարյալի լեռնանցքում սողանքի հետևանքով 1 մարդ մահացել է, 7-ը անհետ կորած են: Այս մասին ասվում է Վրաստանի վարչապետ Իրակլի Ղարիբաշվիլիի մայիսի 19-ին հրապարակված հայտարարության մեջ, հայտնում է ITAR-TASS-ը:
Ավելի վաղ հայտնում էին 3 զոհի մասին:
Վարչապետը ցավակցություն է հայտնել Ուկրաինայի քաղաքացու ընտանիքին, որը զոհվել է աղետի հետևանքով: «Չնայած փրկարար ծառայություններն Ուկրաինայի քաղաքացուն անհետաձգելի օգնություն են ցուցաբերել և ժամանակին նրան հասցրել են Թբիլիսի՝ կլինիկա, սակայն նրան փրկել չի հաջողվել»,- ասվում է փաստաթղթում և նշվում, որ «աղետի հետևանքով 7 մարդ համարվում է անհետ կորած»:
Վարչապետը նաև շնորհակալություն է հայտնել ռուսական կողմին՝ սողանքի հետևանքները վերացնելու հարցում օգնություն առաջարկելու համար:
«Դարյալի լեռնանցքում արդեն երրորդ օրն է՝ կյանքի համար ռիսկային պայմաններում անձնվիրաբար աշխատում են Վրաստանի փրկարար և արտակարգ ծառայությունների աշխատակիցները. աղետի կրկնվելու վտանգ կա»,- ասվում է հայտարարության մեջ:
Մայիսի 17-ին Դարյալի լեռնանցքում սողանքի հետևանքով փակվել է Վրաստանով անցնող «Հյուսիս-Հարավ» գազատարի հատվածը: Անցած երկու օրերի ընթացքում վրացի փրկարարներն աղետի գոտուց հանել են ավելի քան 220 մարդու:
