Մարդու իրավունքների պաշտպանը դժգոհ է եկող տարվա բյուջեի նախագծով իր ղեկավարած կառույցին հատկացվելիք գումարից, թեև դա ավելացել է։ «Բյուջեն աճել է ընդամենը 3 միլիոն դրամով: Մեր դժգոհությունը միայն այս տարի չէ, որ բարձրացնւմ ենք, նախորդ տարի ևս մենք բազմաթիվ ֆինանսական-տնտեսական խնդիրներ ենք բարձրաձայնել բյուջեի քննարկման ժամանակ»,- «Երկիր Մեդիա» հեռուստաընկերության «Երկրի հարցը» հաղորդման եթերում ասել է օմբուդսմեն Կարեն Անդրեասյանը:
Նա նշել է, որ նախորդ տարի 10 միլիոն դրամ էին խնդրել՝ ավելացնել բյուջեով՝ երեխաների և կանանց հարցերով իրավապաշտպանների հաստիք ավելացնելու համար, հասան նպատակին, մի էդքան էլ այս տարի էին ուզում, բայց չստացվեց: «Որպեսզի լիարժեք կարողանանք աշխատել, այն էլ՝ մինիմալ ծավալներով, մեզ պետք է որ բյուջեն կրկնպատկվի: Այսօր էլ այդպես է, բայց դրամաշնորհների հաշվին: Պետական ինստիտուտը հավերժ պահել դրամաշնորհներով՝ անընդունելի է, դա հարվածում է իմ անկախությանը: Մեր բյուջեն ամբողջությամբ շուրջ 176 միլիոն դրամ է, որը համաչափ է ինչ-որ ՊՈԱԿ-ի, գիտահետազոտական ինստիտուտի գումարներին: Մեր խնդրանքը այս տարի մեկ այլ սիմվոլիկ՝ 10 միլիոն դրամ ավելացնելն է»,- ասել է Կարեն Անդրեասյանը՝ հաջորդ հարցերին պատասխանելիս ևս պարբերաբար հիշեցնելով իր 10 միլիոնի մասին:
Խոսելով նվազագույն աշխատավարձը 2500 դրամով բարձրացնելու մասին՝ օմբուդսմենը նշել է, որ դա նման է իր 10 միլիոնին, երկուսն էլ քիչ է: Նա նշել է, որ թե՛ աշխատավարձերի վերաբերյալ են բողոք ստանում, թե՛ թոշակների, սակայն ինքը իրավունք չունի նվազագույն աշխատավարձի չնչին բարձրացման կամ կուտակային կենասթոշակների համակարգի դեմ հանդես գալ, քանի դեռ օրենք չի խախտվել:
Ապա անդրադառնալով մարդու իրավունքների եվրոպական դատարանում Հայաստանի պարտություններին և այդ առիթով պետբյուջեից վճարվող գումարներին՝ Կարեն Անդրեասյանը ասել է, որ հենց այդտեղ պետք է խնայողություններ անել, այլ ոչ թե իր 10 միլիոնից:
