ԿԸՀ անդամ, ՀԱԿ ներկայացուցիչ Զոյա Թադևոսյանը «Առաջին լրատվականի» հետ զրույցում, անդրադառնալով Գեղարքունիքի մարզի Դարանակ համայնքի ղեկավարի և ավագանու անդամների անվավեր ճանաչված ընտրություններին, նշեց, որ թեկնածուները, եղած ընտրողների քանակով իրենց հաղթանակին վստահ չլինելով, դրսից են մարդիկ բերել և գրանցել այդ համայնքում:
«Հնարավոր է, որ այդ մարդիկ բոլորն էլ գրանցված են գյուղապետի տան վրա, և ոչ ոք դա չի կարող ցույց տալ: Այս ընտրակեղծիքը մասայական ապրելու իրավունք ստացած կեղծիք է և նոր չէ, որ երևան է եկել. սա վաղուց գործողության մեջ դրված կեղծիք է, և հենց սա է մեր տունը քանդում»,- կարծիք հայտնեց Զոյա Թադևոսյանը:
Թադևոսյանի խոսքերով, եթե մեկ համայնքում են բնակչության թվաքանակը ընտրություններից առաջ ավելանում 50 տոկոսով, ապա ամբողջ հանրապետության ընտրողների թիվը 50 տոկոսով ավելացնելով` ստանում ենք այն թիվը, ինչը մեր իշխանությունները յուրաքանչյուր ընտրությունից հետո ներկայացնում են և պարծենում իրենց քվեներով. «Այսպես են տեղի ունենում կեղծիքները: Սա շատ լավ օրինակ էր, և ես շատ ուրախ եմ այս բացահայտման համար: Սա ուղղակի բացահայտեց այն, ինչը ընդդիմությունը մշտապես ահազանգում է»:
Ըստ Թադևոսյանի` Դարանակի դեպքերը հիմնավորում են, թե ինչու են մեր երկրում տեղի ունենում մեծ թվով ընտրակեղծիքներ:
