Թավադրոս Երկրորդ պատրիարքը, ով դարձել է ղպտական ուղղափառ եկեղեցու 118-րդ ղեկավարը, իր առաջին քարոզը նվիրել է Եգիպտոսում տիրող իրավիճակին: Նա հայտարարել է, որ եկեղեցին չի աջակցի այն սահմանադրությանը, որը կծառայի երկրի միայն մեկ կրոնական համայնքի շահերին:
«Եգիպտոսի գեղեցկությունը մահմեդականների և քրիստոնյաների համակեցության մեջ է: Բազմազանությունն ուժի աղբյուր է»,- հայտարարել է նա:
Պատրիարքը նաև նշել է, որ սահմանադրական խորհրդում ևս պետք է ներկայացված լինի երկրի բազմակրոն բնակչությունը, ու այնտեղ պետք է տեղ գտնվի մահմեդականների և քրիստոնյաների, հոգևորականների և աշխարհիկների, լիբերալների և պահպանողականների համար:
«Որպեսզի Եգիպտոսը գնա զարգացման ուղով, սահմանադրությունը պետք է պաշտպանի յուրաքանչյուրի շահերը: Եթե այն ծառայի բնակչության միայ մեկ խմբին, ապա ամբողջ հասարակությունը հետ կգնա»,- ասել է նա:
Թավադրոս Երկրորդը նաև հայտնել է, որ եթե իսլամիստներին հաջողվի շարիաթի օրենքների վրա հիմնված սահմանադրություն ընդունել, ապա քրիստոնյաները վճռականորեն կբողոքեն: Նա կոչ է արել ղպտիներին ավելի ակտիվ մասնակցություն ունենալ քաղաքական կյանքին և պայքարել ոչ միայն իրենց, այլև ամբողջ հասարակության իրավունքների պաշտպանության համար:
