Սիրիացի ապստամբները առաջին անգամ YouTube վիդեոհոսթինգում տեղադրել են նոր տեսանյութ, որում երևում է տանկերի մարտը: Տեսանյութի հեղինակների բացատրությամբ՝ նրանում պատկերված իրադարձությունները տեղի են ունեցել Հալեպ նահանգում, նոյեմբերի 5-ին:
Տեսագրությունում երևում է, որ ապստամբների տանկը հետևի կողմից մոտենում է կառավարական ուժերի տանկին և ոչ մեծ հեռավորությունից ուղիղ նշանառությամբ կրակ արձակում նրա ուղղությամբ: Արկն ընկել է տանկի՝ առավելապես քիչ պաշտպանված հատվածում, ինչի հետևանքով կառավարական տանկը սկսել է այրվել, և մեկ րոպե անց՝ պայթել: Տեսանյութում խոսքը գնում է շինությունների հրետակոծման մասին, որտեղ թաքնվել են զինծառայողները:
Վերջին շաբաթներին ապստամբները ուժեղացրել են ճնշումը Բաշար Ասադի ուժերի վրա երկրի հյուսիսում՝ Հալեպում և Իդլիբում: Մասնավորապես, նոյեմբերի 4-ին նրանք հարձակում են իրականացրել «Տաֆտանազ» ավիաբազայի վրա, հրդեհել մի քանի ինքնաթիռներ և ուղղաթիռներ: Օպերացիան իրականացվել է տանկերի մասնակցությամբ:
