2008 թվականի ընտրություններում ԱՄՆ-ում ընտրվեց առաջին աֆրոամերիկացի նախագահը: 4 տարի անց ռասային հարցերը մոռացված են թվում: Դա արդյոք նշանակո՞ւմ է, որ ռասային խտրականությունը այլևս խնդիր չէ ԱՄՆ-ի համար: Euronews-ի այս հարցին պատասխանել է Դեմոկրատական կուսակցությունից Կոնգրեսի անդամ, քաղաքացիական իրավունքների հայտնի մարտիկ Էլեոնորա Հոլմս Նորթոնը: Նա կարծում է, որ ռասիզմը նախկինի պես գոյություն ունի.
«Ռասիզմը բավականին դժվար է հայտնաբերել, քանի որ սպիտակամորթ քաղաքացիների մի մասը վախենում է իրեն ռասիստ ցույց տալ: Սակայն ես կարծում եմ, որ ռասիզմը դեռ գոյություն ունի: Ամերիկայում ռասիստներին խեթ են նայում: Եվ չնայած նրանք կան, նրանց ի հայտ բերելը հեշտ չէ»:
2008-ի ընտրություններից առաջ անցկացված սոցհարցումների տվյալներով՝ Օբաման ևս 6 տոկոս ձայն կստանար, եթե սպիտակամորթ լիներ:
Բնակչության մարդահամարի ամերիկյան բյուրոյի վերջին տվյալները վկայում են այն մասին, որ առաջին անգամ Ամերիկայում էթնիկ փոքրամասնությունների պատկանող ընտանիքներում ծնված երեխաների թիվը գերազանցել է սպիտակամորթ ընտանիքներում ծնված երեխաների թիվը: Դա նշանակում է, որ թեև սպիտակամորթները մեծամասնություն են կազմում, սակայն շուտով պատկերը կփոխվի և կհանգեցնի սոցիալական և քաղաքական լուրջ փոփոխությունների:
