ԱԺ ՀՀԿ խմբակցության անդամ Սուքիաս Ավետիսյանից այսօր լրագրողները հետաքրքրվեցին, թե ՀՀԿ-ն ի դեմս Ռոբերտ Քոչարյանի, Գագիկ Ծառուկյանի կամ Վարդան Օսկանյանի` լուրջ մրցակից տեսնո՞ւմ է և վախենո՞ւմ է այդ թեկնածուներից: Ի պատասխան` Սուքիաս Ավետիսյանը ասաց. «Մինչև չլինի կոնկրետ հայտարարություն, ոչինչ չենք կարող ասել: Մենք վախեցածի տպավորություն երբեք չենք թողել»:
Սուքիաս Ավետիսյանի դիտարկմամբ՝ նախընտրական շրջանում տիրում է անորոշություն, քանի որ մյուս ուժերը լավ են հասկանում, որ ՀՀԿ թեկնածու Սերժ Սարգսյանը ֆավորիտ է: Միաժամանակ նա մյուս քաղաքական ուժերին խորհուրդ տվեց հստակեցնել իրենց դիրքորոշումները, որպեսզի հանրությունը կողմնորոշվի:
Նրա խոսքով` այսօր քաղաքական դաշտում տիրող ամենամեծ դժբախտությունն այն է, որ քաղաքական ուժերի տարբեր անդամներ ամեն օր տարբեր դիրքորոշումներ են հայտնում: Սուքիաս Ավետիսյանը ասաց, որ խոսքը վերաբերում է նաև ԲՀԿ-ին:
