Եվրոպայում անվտանգության և համագործակցության կազմակերպությունը (ԵԱՀԿ) մտադիր է խստորեն վերահսկել ԱՄՆ-ի նախագահական ընտրությունների ընթացքը: Այս մասին հաղորդում է ITAR-TASS-ը՝ վկայակոչելով կազմակերպության խորհրդարանական ասամբլեայի հատուկ ներկայացուցիչ Անդրեաս Նոթելլեին:
Ներկայացուցչի խոսքերով՝ այս ոլորտում «երկակի ստանդարտներ» չպետք է լինեն: Փորձագետները մտադիր են ուշադրություն դարձնել ոչ միայն ընտրական գործընթացին, այլ նաև, ընդհանուր առմամբ, ԱՄՆ-ում ընտրությունների կազմակերպմանը:
Նոթելլեն հաղորդել է, որ քվեարկության մոնիթորինգն իրականացնելու են ԵԱՀԿ անդամ երկրների 160 ներկայացուցիչներ:
Միջազգային դիտորդները նախօրոք գիտեն, որ ոչ ամեն տեղ կարող են այցելել ընտրատեղամասեր, քանի որ որոշ շրջաններում դա արգելված է տեղական օրենքներով:
ԱՄՆ-ի նախագահական ընտրությունների վերաբերյալ նախնական զեկույցը ԵԱՀԿ-ն կպատրաստի նոյեմբերի 8-ին:
