Արքայազն Թուրքի բն Սաուդ բն Մուհամմեդը հայտարարել է, որ Սաուդյան Արաբիան հաջորդ տարի ուղեծիր կարձակի առաջին գերճշգրիտ արհեստական արբանյակը, որը կծառայի երկրի քաղաքացիական պահանջմունքներին: Այս հարցում, ըստ Arabianbusiness–ի, սաուդցիներին կօգնի ամերիկյան NASA գործակալությունը։
Այս մասին արքայազնը հայտարարել է միջազգային ավիատիեզերական համաժողովի բացման ժամանակ, որը կազմակերպվել է թագավոր Աբդել Ազիզի բարձր հովանու ներքո: Էմիրը նշել է, որ թագավորության տիեզերական տեխնիկայի ոլորտում 170 սաուդյան գիտնականներ են աշխատում, որոնցից 50-ը կանայք են:
Սաուդյան առաջին տիեզերագնացը՝ արքայազն Սուլթան բն Սալմանը, ով զբոսաշրջության և ճարտարապետական հուշարձանների կառավարման կենտրոնի ղեկավարն է, հիշեցրել է, որ դեռ 27 տարի առաջ Սաուդյան Արաբիան առաջատար էր կապի ոլորտում: Այժմ թագավորությունը կարևոր տեղ է զբաղեցնում տարածաշրջանային Arabsat արբանյակային ընկերության մեջ և այս ոլորտում առաջ է ընկել տարածաշրջանի մյուս երկրներից:
Արքայազնը ներկայացրել է նաև իր «Մի մոլորակ» գիրքը, որում նկարագրված են բազմաթիվ փաստեր, պատմության գաղտնիքներ։ Գրքում նաև նշվում է տիեզերական արտադրության հանդեպ երկրի հատուկ վերաբերմունքի մասին:
Այս ավիատիեզերական համաժողովին մասնակցում են աշխարհի 18 երկրներից տիեզերագնացներ, ովքեր կարող են գիտելիքներ ու փորձ փոխանակել։
