Քենիայի արևմուտքում գտնվող Կոգելո գյուղի շամանը կանխագուշակել է, որ Սպիտակ տան գործող ղեկավարն ԱՄՆ նախագահական ընտրություններում կհաղթի։ Այս մասին գրում են միջազգային ԶԼՄ-ները:
Իր գուշակությունները կախարդ Ջոն Դայմոն արել է ավանդական մոգական ծիսակատարությունների շնորհիվ: «Օբաման առջևում է: Նա, անկասկած, պետք է հաղթի»,- վստահեցրել է կախարդը, ով, իր խոսքերով, այս տարի դարձել է 105 տարեկան: Եթե շամանի խոսքերը, իր տարիքի հետ կապված, ճիշտ են, ապա նա պետք է հիշի Բարաք Հուսեյն Օբամա-ավագին, ով ծնվել է Կոգելոյում 1936 թվականի ապրիլին: Նրա որդին՝ նախագահ Օբաման, Քենիայում երբեք չի ապրել, սակայն այդ երկիրն իր «երկրորդ տուն» է անվանում:
Գործող նախագահի հայրը 1982 թ. մահացել է ճանապարհային պատահարի հետևանքով` Քենիայում:
Բարաք Օբաման ծնվել է Հավայան կղզիներում՝ 1961 թվականին: Նրա ծնողները երկու տարի անց բաժանվել են, որից հետո ավագ Օբաման վերադարձել է Քենիա և աշխատել որպես պետական ծառայող: ԱՄՆ նախագահի տատիկը մինչ օրս ապրում է Կոգելոյում, նրան մեծ թվով լրագրողներ և պարզապես հետաքրքրասերներ են այցելում:
