Թունիսում FEMEN շարժման մասնաճյուղն այս երկրում Բահրեյնի դեսպանատան առջև ցույց է կազմակերպել: Աղջիկները պատռել են Բահրեյնի թագավոր Համիդ իբն Իսա Ալ-Խալիֆի նկարները՝ բողոքելով ակտիվիստ Զահնաբի ձերբակալության դեմ։ Այս մասին տեղեկացվում է ուկրաինական ֆեմինիստների կայքում:
«Դեպքը տեղի է ունեցել էմիրի դեմ ցույցերի ժամանակ, երբ ընդդիմության ներկայացուցիչներից մեկի դուստրը պատռել էր թագավորի դիմանկարը, որից հետո ձերբակալվել էր հատուկ ծառայությունների կողմից և բանտարկվել»,-բացատրում են ակտիվիստները:
«FEMEN-ը կոչ է անում աշխարհի բոլոր կանանց ավելի ակտիվ դիմակայել իսլամական ռեժիմների քարանձավային վայրենությանը, որոնք կանանց վերաբերվում են որպես ստրկուհիների: Վե՛րջ իսլամիզմին: Ազատությո՛ւն կանանց»,- ասվում է շարժման հայտարարության մեջ:
Դատելով կայքում տեղադրված լուսանկարներից՝ շարժման մասնակիցները հագնված են եղել: Հիշեցնենք, որ հոկտեմբերի 26-ին FEMEN ուկրաինական շարժման ակտիվիստ Իննա Շևչենկոն թոփլես-ակցիա էր կազմակերպել «Ալ-Ջազիրա» հեռուստաալիքի ուղիղ եթերում՝ ի նշան արևելյան երկրներում կանանց փարաջա հագնելու դեմ բողոքի:
Ուկրաինուհին հանվել էր The Stream-ի երեկոյան ծրագրի ժամանակ, երբ քննարկվում էր ֆեմինիզմի և իսլամի միջև գոյություն ունեցող խնդիրները: Հաղորդավարուհին խնդրել էր Շևչենկոյին մեկնաբանել իր այն արտահայտությունը, որ մերկությունը փարաջայից ավելի լավ է: Շևչենկոն պատասխանել էր. «Կնոջ մարմին իր ազատության ինդիկատորն է հանդիսանում: Փարաջան տղամարդու հագուստ է, որը կանանց ստիպում են հագնել: Եվ երբ ես հնարավորություն եմ ունենում հանել հագուստս, ա՛յ թեկուզ հենց հիմա, արաբական հեռուստատեսությամբ…» և Շևչենկոն հանել էր բլուզը: Սակայն այդ կադրը եթերում չէր հայտնվել:
