Վերջերս Ազգային ժողովում ԲՀԿ խմբակցության քարտուղար Նաիրա Զոհրաբյանը հայտարարել էր, թե Հազարամյակի մարտահրավերներ ծրագրի շրջանակներում գյուղացիների համար դասախոսությունների վրա ծախսվել է 16.6 մլն դոլար և որ այդ գումարը ծախսողները հանրության առջև պետք է ապացուցեն իրենց անմեղությունը:
Ֆինանսների նախարությունն էլ միանգամայն լրջորեն արձագանքել է այս կոչին ու հրապարակել տեղեկանք, թե ինչ է արվել ծրագրի շրջանակներում, ում կողմից և որքան է ծախսվել: Ըստ այդմ՝ Ջրից դեպի Շուկա բաղադրիչի ենթածրագիրն իրականացվել է «ԷյՍիԴիԱյ» Վօկա ամերիկյան ընկերության կողմից ղեկավարվող կոնսորցիումի կողմից, որում ներգրավված էին «Արկադիս Եվրոկոնսալտ» հոլանդական և «Վիստա Պլյուս» տեղական ընկերությունները: «ԷյՍիԴիԱյ Վօկա» ամերիկյան ընկերության կողմից ղեկավարվող կոնսորցիումի մաս հանդիսացող «Վիստա Պլյուս» տեղական ընկերության կողմից տրամադրված Վերապատրաստումների բաղադրիչին ծառայությունների պայմանագրային արժեքը կազմել է 6.6 միլիոն ԱՄՆ դոլար` Կոնսորցիումին շնորհված 18.7 միլիոն ԱՄՆ դոլար ընդհանուր պայմանագրային գումարից: Ամեն մասնակցի 1 օրվա դասընթացի արժեքը կազմել է մոտ 6,650 ՀՀ դրամ, որը ներառում էր վերապատրաստողի վարձատրությունը, դասընթացի կազմակերպումը, տպագրական նյութերը, լսարանի նախապատրաստումը, տեխնիկական ապահովումը, սննդի և օրական 2 անգամ սուրճի ընդմիջման ապահովումը, տրանսպորտային ծախսերը և այլն: Ընդհանուր առմամբ ծրագրում ներգրավված են եղել 27 վերապատրաստող, 15 համակարգող, և 20-ից ավելի օժանդակ կազմ:
«Հարկ է նշել, որ հանրապետությունում դեռեւս նկատվում է վերոհիշյալ դասընթացների պահանջարկ: Դրա վկայությունն են վերջին մեկ տարվա ընթացքում կազմակերպության կողմից նույն ձևաչափով իրականացված դասընթացները, որոնց մասնակցել է ավելի քան 150 ֆերմեր: Այս դեպքում վճարողը հանդիսացել է ինքը՝ ֆերմերը: Նախատեսվում է առաջիկայում նույնպես անցկացնել նմանատիպ դասընթացներ՝ համաձայն ֆերմերների կողմից ներկայացված հայտերի»,- նշել են ֆինանսների նախարարությունից:
