«Ադրբեջանա-հունգարական խայտառակ գործարքից անցել է երկու ամիս: Դրանից հետո մինչ օրս Ադրբեջանի ղեկավարությունը չի դադարում հանդես գալ ռազմական հռետորաբանությամբ և կոչեր է անում»,- այսօր ԱԺ հանձնաժողովների համատեղ նիստում 2013թ. բյուջեի նախագծի քննարկումների ժամանակ հայտարարեց ԱԺ փոխխոսնակ Էդուարդ Շարմազանովը և ԱԳ նախարար Էդուարդ Նալբանդյանին հարցրեց` ո՞րն էր վերջերս նրա և Ադրբեջանի ԱԳ նախարար Էլմար Մամեդյարովի հանդիպման նպատակը:
Ի պատասխան` Է. Նալբանդյանն ասաց, որ հանդիպման գլխավոր նպատակն Ադրբեջանին վերադարձնելն էր բանակցային կառուցողական դաշտ: Ըստ նրա՝ նախկին հանդիպումներում Ադրբեջանը մերժում էր առաջարկները՝ բանակցությունների գործընթացն առաջ տանելու ուղղությամբ, և գնում էր բանակցային գործընթացը տապալելուն: Սաֆարովի դեպքը ևս տանում էր գործընթացի տապալմանը:
Նալբանդյանի խոսքով՝ միջազգային հանրությունը համապատասխան արձագանքով արտահայտեց իր վերաբերմունքը Ադրբեջանի նկատմամբ. «Չկա մի երկիր, որ խստորեն չարձագանքեր և չարտահայտեր իր վերաբերմունքը: ՀՀ-ի նպատակը բանակցային գործընթացը շարունակելն է և Ադրբեջանին խաղաղ բանակցային գործընթաց պարտադրելը: Միջազգային հանրությունը համամիտ է ՀՀ-ի հետ, և մենք եռանախագահների հետ շարունակելու ենք ջանքերը՝ ուղղված հակամարտությունը խաղաղ ճանապարհով հանգուցալուծելուն:
Լուսանկարը՝ PanARMENIAN Photo-ի
