ԱՄՆ-ի ամենահարուստ 400 քաղաքացիների կեսից ավելին մեծ գումարներ են նվիրաբերել ԱՄՆ նախագահի պաշտոնի համար պայքարող դեմոկրատ Բարաք Օբամային կամ հանրապետական Միթ Ռոմնիին: Ըստ Forbes-ի` 400 դոնորների կողմից թեկնածուների ընտրարշավին նվիրաբերված գումարի ընդհանուր չափը կազմում է 1,7 տրիլիոն դոլար, ինչը 10 տոկոսով ավելի է երկրի ՀՆԱ-ի ցուցանիշից:
Ռոմնին և Հանրապետական ազգային կոմիտեն առաջատար են՝ մինչև հոկտեմբերի 17-ը 158 դոնորներից ստացած 3,4 մլն դոլարով: 4 տարի առաջ նախագահի հանրապետական թեկնածու Ջոն Մաքքեյնի հավաքած գումարն ընդամենը 2,8 մլն դոլար էր:
Օբաման և Դեմոկրատական ազգային կոմիտեն ամենահարուստ 62 մարդկանցից 1,7 միլիոն դոլար են հավաքել: 2008 թվականին Օբամային հաջողվել էր այս էլիտար խմբից 1,3 մլն դոլար հավաքել:
Այս գումարները հարուստների կողմից Քաղաքական ակցիայի կոմիտեների (ՔԱԿ) ստացված գումարների համեմատ քիչ են, որոնք իրավաբանորեն անկախ են արշավներից, սակայն ղեկավարվում են թեկնածուների նախկին օգնականների կողմից:
Մինչև հոկտեմբեի կեսերը Ռոմնիի Restore Our Future Քաղաքական ակցիայի կոմիտեն 43 միլիարդատերերից ստացել է 44,8 մլրդ դոլար, իսկ Օբամայի USA Action-ը նույն ժամանակահատվածում 12 միլիոնատերերից ստացել է 16,6 մլրդ դոլար: Թեկնածուներին աջակցող այլ կոմիտեներ նրանց բերել են մի քանի տասնյակ միլիոն դոլարներ:
Ռոմնիի արշավի առավել ակտիվ դոնորներն են գործարարներ Դևիդ Կոխը, Չարլզ Կոխը, Ջիմ Ուոլթոնը, Էլիս Ուոլթոնը, Շելդոն Ադելսոնը:
Օբամայի ընտրապայքարը ֆինանսավորած առավել ակտիվ 5 դոնորներն են Բիլ Գեյթսը, Ուորեն Բաֆեթը, Սերգեյ Բրինը, Ջորջ Սորոսը, Սթիվ Բալմերը:
