Պաղեստինի ազգային վարչակազմի առաջնորդ Մահմուդ Աբասը իսլամական ընդդիմությանը մեղադրել է Իսրայելի հետ գաղտնի բանակցություններ ունենալու մեջ: ՀԱՄԱՍ շարժման իսլամիստները հերքում են մեղադրանքները և ապացույցներ պահանջում: Այս մասին հայտնում է RIA Novosti-ն:
Եգիպտական «Ալ-Հայաթ» հեռուստաալիքի հետ հարցազրույցում Աբասը հայտնել էր, որ իսրայելական կողմն ու ՀԱՄԱՍ-ը քննարկում են երկարաժամկետ հրադադարի կնքման և ժամանակային սահմաններում պաղեստինյան պետության նախագիծը: Նա ընդգծել էր, որ իր համար նման տարբերակն անընդունելի է:
Պաղեստինի ազատագրման կազմակերպության Բանակցությունների հարցերով վարչության ղեկավար Սաիբ Օրեյկատը հաստատում է, որ իսրայելցիներն ու իսլամիստները գաղտնի բանակցում են Շվեյցարիայում միջնորդների միջոցով, ինչը, նրա խոսքով՝ հակասում է ՀԱՄԱՍ-ի հայտարարությանը, թե իրենք ձգտում են պաղեստինյան պետություն ստեղծել Միջերկրական ծովից Հորդանան գետ ընկած տարածքում: Օրեյկատն այս մասին հայտնել է «Պաղեստինի ձայն» ռադիոկայանի եթերում:
Իսրայելական լրատվական «Ուայ-նետ» կայքը մեջբերել է Աբասի պաշտոնական ներկայացուցիչ Նաբիլ Աբու Ռուդեյնին, որը խոստացել է, որ Պաղեստինի ազգային վարչակազմը շուտով կհրապարակի գաղտնի բանակցություների մասին տեղեկությունը, որում, նրա խոսքով՝ առկա են «տարրեր արաբական այլ երկրներից»:
ՀԱՄԱՍ շարժման քաղբյուրոյի ղեկավարի տեղակալ Մուսա Աբու Մարզուկը հերքել է տեղեկությունները:
«Մենք բանակցություններ չենք վարում օկուպանտների հետ, երբեք չենք համաձայնի ժամանակային սահմաններում պետության և չենք ճանաչում Իսրայելը: Ցանկանում եմ Աբու Մազենից (Աբաս) իմանալ, որտե՞ղ և ե՞րբ են տեղի ունեցել այդ բանակցությունները, և ո՞վ է դրան մասնակցել»,- գրել է Աբու Մարզուկը Facebook-ի իր էջում:
