Apple iPad mini-ի բաղադրիչների ինքնարժեքը կազմում է 188 դոլար` մեկ հատ 16 Գբայթ հիշողությամբ տարբերակի դեպքում` առանց ներկառուցված բջջային մոդուլի, որը ամերիկյան շուկայում վաճառվում է 329 դոլարով: Այս մասին հաղորդում է All Things Digital կայքը` հղում կատարելով վերլուծական IHS iSuppli ընկերությանը:
Ըստ IHS iSuppli-ի՝ iPad mini-ի ամենաթանկարժեք դետալը 7,9 դյույմանոց էկրանն է` 80 դոլար արժողությամբ:
IHS iSuppli-ի մասնագետները նշում են, որ Apple-ը սկսել է աստիճանաբար հրաժարվել մրցակից Samsung ընկերության ծառայություններից, որի հետ արդեն 1.5 տարի է դատական գործընթացների մեջ է տարբեր երկրներում: IPad mini–ի դեպքում Samsung-ն արտադրել է միայն A5 պրոցեսորը, իսկ այնպիսի մասեր, ինչպիսիք են էկրանը, օպերատիվ հիշողությունը և ֆլեշ–հիշողությունը, այլ ընկերություն է արտադրել։
Apple-ի նոր iPad mini-ի վաճառքը մեկնարկել է նոյեմբերի 2–ին՝ աշխարհի 34 երկրներում, սակայն այն դեռևս չի արժանացել այնպիսի ուշադրության, ինչպիսին լինում է Apple–ի նորույթների դեպքում: Վերլուծաբանների կարծիքով՝ այս հանգստյան օրերին ընկերությունը կվաճառի 1-1,5 մլն պլանշետ:
