Այսօր` նոյեմբերի 3-ին, ավտովթար-դանակահարություն և կրակոցներ են հնչել Գեղարքունիքի մարզում: Ժամը 00:10-ի սահմաններում Գավառի բժշկական կենտրոնից Ոստիկանության Գավառի բաժին հայտնել են, որ որովայնի առաջնային պատի կտրած-ծակած թափանցիկ վերքեր, պարանոցի առաջնային մակերեսի կտրած ծակած վերք արտաքին լծային երակի վնասումով, աջ վերին վերջույթի դաստակի միջային մակերեսի կտրած վերք մարմնական վնասվածքով իրենց մոտ է անգիտակից վիճակում տեղափոխվել Գավառ քաղաքի Գրիգոր Լուսավորիչի 14 շենքի բնակիչ, 36-ամյա Կարեն Զազյանը:
Ինչպես հայտնում է shamshyan.com-ը հիվանդանոց են մեկնել Ոստիկանության Գեղարքունիքի մարզային վարչության պետի օպերատիվ գծով տեղակալ Ա. Ադամյանը, Գավառի Ոստիկանության պետ Կարեն Նիկոլյանը, Ոստիկանության քննչական գլխավոր վարչության Գեղարքունիքի մարզի քննչական բաժնի պետի տեղակալ Մ. Ներսիսյանը:
Ոստիկանության Գավառի բաժնում օպերատիվ տեղեկություններ են ստանում, և տեղեկությունը իրացնելով` ոստիկանները պարզում են, որ նոյեմբերի 2-ին, ժամը 23-50-ի սահմաններում, Գավառ քաղաքի «ազատապադյոմ» կոչվող տարածքի մոտ հիվանդանոց տեղափոխված Կ. Զազյանը վիճաբանել է Գավառ քաղաքի Ազատության 29 հասցեի բնակիչ, 31-ամյա Գևորգ Մելքոնյանի հետ: Վերջինս էլ սուր կտրող-ծակող առարկայի գործադրմամբ վնասվածքներ է պատճառել Կ. Զազյանին:
Գավառցիները ֆոտոլրագրողին պատմել են, որ վիճաբանությունը եղել է ավտոմեքենաներով իրար չզիջելու և ազդանշան տալու համար: Վ. Զազյանը եղել է Մերսեդես մակնիշի 91 NA 111 համարանիշի ավտոմեքենայով, իսկ Գ. Մելքոնյանը` ՎԱԶ 2121 մակնիշի 87 ՍՏ 773 համարանիշի ավտոմեքենայով:
Արդեն ժամը 01-25-ի սահմաններում նույն բժշկական կենտրոնից Ոստիկանության Գավառի բաժին հայտնում են, որ կրծքային 12-րդ ողի ներհրում կրծքավանդակի սալջարդ ցնցումային համախտանիշ մարմնական վնասվածքներով իրենց մոտ է տեղափոխվել Գավառ քաղաքի Ազատության 67/6 շենքի բնակիչ, 30-ամյա Տարոն Աբրահամյանը:
Ոստիկանության Գավառի բաժնի աշխատակիցները կարճ ժամանակում պարզում են, որ Տ. Աբրահամյանը հիվանդանոց է տեղափոխվել այն բանի համար, երբ Կարեն Զազյանի դեպքով նրա եղբայրը` Գավառ քաղաքի Միքայելյան 12 տան բնակիչ, 30-ամյա Վարդգես Զազյանը Ազատության փողոցում վարելով Մերսեդես մակնիշի 91 NA 111 համարանիշի ավտոմեքենան, նկատում է ՎԱԶ 2121 մակնիշի 07 ՍՕ 444 համարանիշի ավտոմեքենային, որի ղեկին Տ. Աբրահամյանն է լինում:
Վ. Զազյանը մտածելով, որ իր եղբորը դանակահարել է նշված ավտոմեքենայի վարորդը, Մերսեդեսով խփում և գլխիվայր շրջում է Նիվան, ինչի հետևանքով էլ Տ. Աբրահամյանը ստանում է վնասվածքները:
shamshyan.com-ը հայտնում է, որ Գեղարքունիքի մարզի ոստիկանները հայտնաբերել են չորս ավտոմեքենաները, վիճաբանության բոլոր մասնակիցներին և գազային ատրճանակը, որից վիճի ժամանակ հնչել են կրակոցներ: Փաստի առթիվ Ոստիկանության քննչական գլխավոր վարչության Գեղարքունիքի մարզի քննչական բաժնի Գավառի քննչական բաժանմունքում հարուցվել է քրեական գործ` ՀՀ քրօրի 34-104 հոդվածի (հանցափորձ, սպանություն) հատկանիշներով:
Գավառցիները shamshyan.com-ին պատմել են նաև, որ եթե Ոստիկանությունը օպերատիվ չգործեր և չտիրապետեր իրավիճակին, ապա այդ «խմորը շատ ջուր կխմեր» ու անհեթեթ վիճաբանությունը, որի հետևանքով կան վիրավորներ, կավարտվեր վրեժխնդրությամբ:
shamshyan.com-ը հայտնում է, որ Կ. Զազյանը աշխատում է Գեղարքունիքի մարզպետարանում` որպես կրթության, սպորտի և երիտասարդության վարչության ավագ մասնագետ, իսկ Տ. Աբրահամյանը` «Սոնագրո» ընկերությունում` որպես մենեջեր:
