Խորհրդարանական ընտրություններում ԲՀԿ–ի ստացած 30 % ձայների երկու երրորդը ԲՀԿ ղեկավար Գագիկ Ծառուկյանի անձնական վարկանիշի արդյունքն է, մեկ երրորդը՝ կուսակցության: Այսօր «Առաջին լրատվական»-ի հետ զրույցում այս մասին ասաց «Սոցիոմետր» սոցիոլոգիական կենտրոնի ղեկավար, սոցիոլոգ Ահարոն Ադիբեկյանը:
Ըստ նրա՝ եթե Գագիկ Ծառուկյանը, ով գալիք նախագահական ընտրություններում ընդդիմադիր թևի ֆավորիտն է, չառաջադրվի, հորդորի իր ձայները տալ Պողոսին կամ Պետրոսին, նրա ձայների շատ քիչ տոկոսը կգնա նրան: Ահարոն Ադիբեկյանն ասաց, որ հաշվարկել են ու գիտեն՝ Ծառուկյանի ձայներն ում են գնալու, եթե նա չառաջադրի իր թեկնածությունը։
«Մի մասը, եթե Ռոբերտ Քոչարյանն առաջադրվի, կգնան նրան, մի մասը՝ Սերժ Սարգսյանին, մյուս մասը՝ Րաֆֆի Հովհաննիսյանին: Մյուս թեկնածուներին ձայն չի գնա, որովհետև նրա իմիջը մյուսներին մոտ չէ, ինքը մոտ է այդ երեք կերպարներին: Խորհրդարանական ընտրություններում ԲՀԿ արձանագրած արդյունքը Ծառուկյանի շնորհքն էր, որովհետև ամբողջ ընտրաքարոզչական աշխատանքն ինքն էր տարել, կար մի դերակատար, որն անընդհատ ելույթներ էր ունենում, հանդիպումներ էր ունենում ու կոչ էր անում: Հանրապետականի դեպքում, բացի Սերժ Սարգսյանից, այլ դեմքեր ևս մասնակցում էին ու բավականին քաշող դեմքեր էին՝ Գալուստ Սահակյան, Հովիկ Աբրահամյան, Շարմազանով, տեղերում մարզպետներ, որոնք ստեղծում են այն ալիքը, որի վրա հանրապետականները կարողացան առաջ անցնել: ԲՀԿ-ի դեպքում դեմքեր չկան, որ Ծառուկյանին մոտ լինեն իրենց վարկանիշով, դրա համար գտնում ենք, որ 30 տոկոս ձայները հիմնականում Ծառուկյանի շնորհքն են»,- մեկնաբանեց Ահարոն Ադիբեկյանը:
Անդրադառնալով «Ժառանգություն» կոսւակցության ղեկավար Րաֆֆի Հովհաննիսյանի առաջադրմանը՝ նա ասաց, որ Րաֆֆի Հովհաննիսյանն այս տարիների ընթացքում ունի իր մնայուն 8-10 % վարկանիշը: Սոցիոլոգը նշեց, որ ավել դեռևս չեն նկատել: «Ապրենք, տեսնենք, թե այս սեսիայում իր վարկանիշը կբարձրանա՞, կմնա նույնը՞, թե՞ կպակասի: Դա կախված կլինի, թե ովքեր են գրանցելու. ընդհանուր վարկանիշային ծավալը կմասնատվի նրանց մեջ։ Մի բան է Լևոն Տեր-Պետրոսյանի առաջադրումը, Ռոբերտ Քոչարյանի, Գագիկ Ծառուկյանի և այլն: Ամեն դեպքում պետք է դիտարկենք, թե ձայներն ինչպես են բաշխվելու»,- եզրափակեց իր խոսքն Ահարոն Ադիբեկյանը:
Հիշեցնենք, որ այսօր լրագրողների հետ հանդիպման ժամանակ «Ժառանգություն» կուսակցության ղեկավար Րաֆֆի Հովհաննիսյանը հայտարարեց գալիք նախագահական ընտրություններում իր թեկնածության առաջադրման մասին:
