Միջազգային հանրությունը չի ցանկանում ի դեմս Լեռնային Ղարաբաղի տեսնել կայացած, ինքնուրույն պետություն: Մայիսի 8-ին լրագրողների հետ հանդիպմանը նշեց, որ 1990-1994 թթ. Երկրապահ ջոկատների կենտրոնական շտաբի պետ, 1992-2000 թթ. պաշտպանության փոխնախարար, Մարտական խաչի 1-ին աստիճանի ասպետ, գեներալ-մայոր Աստվածատուր Պետրոսյանը` մեկնաբանելով ԵԱՀԿ Մինսկի խմբի ամերիկացի համանախագահ Ջեյմս Ուորլիքի` նախօրեին արված հայտարարությունը:
«Մինչև 1998 թվականը մենք չէինք ընդունում, որ Հայաստանը կամ Հայաստանի Զինված ուժերը կազմում են մի բաղկացուցիչ մասը Լեռնային Ղարաբաղի, դրա համար մենք չէինք ընդունվում որպես պատերազմող կողմ: Մենք ընդհանրապես մեր սահմաններն էինք պաշտպանում, դրա համար էս հայտարարությունները մեզ համար նորություն չեն: Միշտ էլ դա եղել է: Բանակցային առաջին փաթեթը հենց էդպիսին է եղել` զիջեք այդ օկուպացիոն տարածքները, ձեզ կտանք մի միջանցք, բայց հետագայում նույնիսկ Շուշին էլ ենք հետ տալու, Խոջալուն էլ, հանրաքվե արեք, և այլն, և այլն, նորից Ղարաբաղը վերադարձնեք: Դա միջազգային հանրության` էսօր Ուկրաինայում ինչ-որ կատարվում է, նույն գործն է: Էդ հանրությունը չի ուզում տեսնի այն, ինչ եղավ, չի ուզում տեսնի կայացած պետություն, մեծ հանրապետություն, որ իրենց հացի մի մասը պիտի խլի, երբ ինքնուրույն լինի, ինքն իր երկրի բյուջեն ունի, հնարավորություններն ունի, մտածում են` եթե դա չասենք, անպայման ոնց որ հիմա Ղրիմը Ուկրաինային, կմիանան»,- ասաց նա` հավելելով, որ ի վերջո, դեկտեմբերի 1-ը չի մոռացվել, չի մոռացվել` ինչպես ճնշվեցին Գերագույն խորհրդի ցույցերը, երեք ժամ կամ երեք օր Գորբաչովի ուշանալը ևս չի մոռացել:
Պետրոսյանի խոսքով` նրանք, լինելով այսօրվա Ռուսաստանը, երբեք չեն ասել, որ Ղարաբաղը պիտի լինի անպայման հանրապետություն և ինքնուրույն հանրապետություն, միջազգային հանրությունը չի կարող ընդունել այդ փաստը, ճանաչել ԼՂ անկախությունը: Պետրոսյանն ընդգծեց` մեզ համար այնքան էլ հարկավոր չէ այլ երկրների կողմից Ցեղասպանության ընդունումը, եթե արդյունք չկա: «Արյան գինը, հողի գինը ոչ ոք չի կարող տալ, դա սերունդների մեջ ապրում է»,- ասաց նա:
Մանրամասները` տեսանյութում:
