Դատարանը պահանջել է Apple-ից apple.co.uk կայքում տեղակայված Մեծ Բրիտանիայում Samsung-ի հետ դատավարության արդյունքի մասին հաղորդագրությունը ուղղել։ Այս մասին հաղորդում է Bloomberg-ը:
Հաղորդագրության ներկայիս տարբերակում ընկերությունը մեջբերում է դատավորի խոսքերը, թե որքան լավն է Apple-ի iPad-ը, ինչպես նաև նշվում է , որ ԱՄՆ-ի և Գերմանիայի դատարաններում Samsung-ը պարտություն է կրել: Բրիտանական արդարադատությունը պահանջում է փոխել հաղորդագրության տեքստը, քանի որ այն տեղակայված է ոչ իրական նպատակին ծառայելու, այլ այն տպավորությունը ստեղծելու համար, որ Samsung-ը կրկնօրինակում է Apple-ին:
Apple-ին 48 ժամ է տրամադրվել, որպեսզի ուղղի հաղորդագրությունը: Ընկերությունը դատարանից խնդրել է երկու շաբաթ ժամանակ, սակայն մերժում է ստացել: Այդ հաղորդագրությունը պետք է մնա ընկերության կայքում մինչև դեկտեմբերի 14-ը:
Նշենք, որ Apple և Samsung ընկերությունները վեճեր ունեն արտոնագրերի վերաբերյալ: Բրիտանական դատարանն այդ վեճերից մեկի քննարկման ժամանակ սահմանել էր, որ Apple-ը պետք է ներողություն խնդրի Samsung-ից, քանի որ վերջինս ոչ մի արտոնագիր չի խախտել, և որպես պատիժ` պետք է ներողություն խնդրի բրիտանական մամուլում: Apple-ը փորձել է բողոքարկել, սակայն ապարդյուն:
