Մեր երկրում կոռուպցիայի դեմ արմատականորեն պայքարելու վերաբերյալ ՀՀ վարչապետին ուղղված նախագահի հանձնարարականի առանձնահատկությունը, ԱԺ ՀՀԿ խմբակցության պատգամավոր Խոսրով Հարությունյանի խոսքերով, ոչ միայն և ոչ այնքան պայքարը արդյունավետ դարձնելն է, որքան քաղաքացիական հասարակության և ընդդիմության ներկայացուցիչներին գործընթացներում ներգրավելը:
«Մեխն այստեղ է: Կաշառակերությունն ու հովանավորչությունները հանրային կյանքի այն բաղադրիչներն են, որոնք կոսմետիկ փոփոխություններով անհնար է վերացնել, և կարոևոր է ոչ միայն իշխանության, այլև ընդդիմության մոտեցումները»,– ասել է նա: Ինչ վերաբերում է այն հարցին, թե ինչու է հիմա հիշել ընդդիմության մասին, Խոսրով Հարությունյանը նշել է, թե միայն հիմա չի հիշել, օրինակ` ԱԺ-ում սկզբում ընդդիմությունն է ելույթ ունենում կամ հարց ուղղում. «Այո, մեզանում ընդդիմության քաղաքական պատասխանատու դերակատարումն իմաստավորելու և ընդլայնելու քաղաքական գործընթաց է, որը շարունակություն կունենա»:
Խոսրով Հարությունյանն ընդունում է, որ նախագահի առաջարկը տեղավորվում է քաղաքական գործընթացների տրամաբանության մեջ բայց, որպես քաղաքացի, իրեն արդյունքն է հետաքրքրում:
Երբ իշխանության ամեն առաջարկության ընդդիմությունը թերահավատորեն է մոտենում, որևէ համագործակցություն չի կայանա: Ուստի Խոսրով Հարությունյանը կարևոր է համարել համագործակցությունը, օրինակ է բերել ՀԱԿ-իշխանություն երկխոսությունը, որը, ըստ նրա, կարևոր էր, բայց չհաջողվեց, որոհետև բոլոր քաղաքականամերձ շրջանակներն աղմուկ բարձրացրեցին:
Հարցին էլ, թե ինչու է իշխանությունը հիմա հիշել կոռուպցիայի մասին, պատասխանել է. «Լավ է ուշ, քան երբեք»: Պատգամավորը անհասկանալի է համարել իշխանության նախաձեռնություններին ընդդիմության հակասությունը:
Խոսելով ընտրությունների թեմայի շուրջ՝ Խոսրով Հարությունյանը նշել է, որ Ընտրական օրենսգրքով բավականին հնարավորություններ են ստեղծվել արդար ընտրությունների համար: Պատգամավորը կարևորել է ընտրակաշառքի դեմ պայքարը և քննադատել ընտրություններից առաջ ընդդիմադիր ուժերի կողմից ստեղծված միասնական շտաբի գործունեությունը, որը, ըստ նրա, ամեն հարց քննարկում էր, բացի ընտրակաշառքից, և որևէ պայքար չծավալեց դրա դեմ:
ՀՀԿ-ական գործիչները մեջբերումներ անելով կոալիցիոն նախավերջին հուշագրից, որտեղ կա ԲՀԿ-ի ղեկավարի ստորագրությունը, նշում են, թե ԲՀԿ-ն առաջիկա ընտրություններում պարտավոր է պաշտպանել Սերժ Սարգսյանի թեկնածությունը: Խոսրով Հարությունյանն այս առիթով ասել է. «Կոալիցիոն հուշագիրը իրավական փաստաթուղթ չէր, այլ քաղաքական, որտեղ վերաբերմունք կար նախագահական ընտրությունների մասին` առ այն, որ պատրաստ են սատարել նախագահի թեկնածությունը: Ցանկացած ուժ կարող է իր քաղաքական դիրքորոշումը փոխել, և որևէ մեկը չի կարող պրետենզիա ներկայացնել: ԲՀԿ-ն ընտրությունների արդյունքում, ստանալով հսկայական ձայն, իր քաղաքական վարքագիծը փոխեց, որտեղ ես դատապարտելի բան չեմ տեսնում»: Այնուհանդերձ, Խ. Հարությունյանի համար անհասկանալի է ԲՀԿ-ի` «իշխանությանն այլընտրանք» ձևակերպումը: «Իշխանության այլընտրանքը ընդդիմությունն է: ԲՀԿ-ի այլընտրանքը ո՞րն է»:
Պատգամավորի խոսքերով՝ մեր երկրում գնում է քաղաքական համակարգի խոշորացման օբյեկտիվ պրոցես:
