Ինչպես տեղեկացրել էինք, «Առաջին լրատվական»-ին երեկ հայտնի էր դարձել, որ հրաժարականի դիմում է ներկայացրել Կոտայքի մարզպետ Կովալենկո Շահգալդյանը, ով ամենաերկարակյաց մարզպետներից էր. մարզը ղեկավարում էր 2001-ից՝ շուրջ 13 տարի: Նրա փոխարեն, որոշ տեղեկություններով, մարզպետ է նշանակվելու բնապահպանության նախկին նախարար Արամ Հարությունյանը:
Երեկ «Առաջին լրատվական»-ը զրուցեց Կովալենկո Շահգալդյանի հետ:
– Պարոն Շահգալդյան, Ձեր հրաժարականի պատճառը կարո՞ղ ենք իմանալ:
– Հրաժարականն ու աշխատանքից դուրս գալը տարբեր բաներ են:
– Դուք միշտ ասում էիք՝ հրաժարական չեք տա…:
– Ես Ձեր ինադու չէի տալիս, տեսա էլ իմ մասին չեք խոսում, հրաժարական տվեցի:
– Ձեր կարծիքով` ի՞նչն էր պատճառը, որ հենց Հովիկ Աբրահամյանի վարչապետության ժամանակ առաջացավ Ձեր՝ աշխատանքից դուրս գալու խնդիրը:
– Վարչապետի ով լինելը որևէ կապ չունի: Արդեն ժամանակն էր իմ գնալու, որովհետև արդեն 13 և մի քիչ էլ ավելի տարիներ աշխատում եմ:
– Իսկ Ձեզ Սերժ Սարգսյա՞նն է հորդորել դիմում գրել, թե՞ Հովիկ Աբրահամյանը:
– Ես եմ որոշում կայացրել: Ես ինքնակամ եմ դիմում գրել, և դրանով վերջ:
– Ինչպե՞ս եք գնահատում ներկա կառավարությունը և նոր վարչապետին:
– Ես նման իրավասություններով և ունակություններով օժտված չեմ, որ ուրիշի աշխատանքին գնահատական տամ: Համ էլ դեռ համբերեք, կառավարությունը ծրագիր կներկայացնի մինչև ամսի 12-ը ԱԺ, ծրագիրը կնայենք, կծանոթանանք ծրագրին, նոր կարծիք կհայտնենք:
– Իսկ Արամ Հարությունյանին ճանաչո՞ւմ եք ապագա մարզպետացու:
– Էնքան Արամ Հարությունյաններ կան, դուք ո՞ւմ նկատի ունեք:
– Բնապահպանության նախկին նախարարին:
– Ես շատ լավ ճանաչում եմ, մենք շատ մտերիմ ընկերներ ենք: Շատ երկար տարիներ իրար հետ աշխատել ենք, հարաբերվել ենք, մինչև հիմա էլ ջերմ հարաբերություններ ունենք:
– Պարոն Շահգալդյան, Դուք այսքան տարի աշխատեցիք իշխանության համար, կարծում եք` գնահատվա՞ծ եք:
– Դուք ճիշտ չեք: Իշխանությունը եթե չգնահատեր, ես 13 և ավելի տարի չէի աշխատի: Գնահատել են իմ աշխատանքը, որ երկար կարողացել եմ, էն էլ Կոտայքի մարզում պաշտոնավարել:
– Ճի՞շտ է, որ հրաժեշտի երեկո եք կազմակերպել:
– Չեմ կազմակերպել, բայց կազմակերպելու եմ: Ես չեմ կազմակերպել, իմ գործընկերներն են կազմակերպել, բա իհարկե: Ես հրաժեշտ չեմ տվել, էսօր, վաղը աշխատանքի մեջ եմ: Մյուս օրը, որ կառավարությունը որոշում կայացրեց, իմ աշխատանքը կընդհատվի: Հրաժեշտը կլինի շաբաթ-կիրակի օրը:
– Պարոն Շահգալդյան, փաստորեն Ձեր պաշտոնավարման ընթացքում Ձեր որդուն դարձրեցիք Չարենցավանի քաղաքապետ:
– Ընտրվում է քաղաքապետը, ոչ թե քաղաքապետ դարձնում են:
– Ուզում եք ասել՝ մարզպետի Ձեր հեղինակության հետ կապ չունե՞ր:
– Բացարձակապես, իմ տղայի հեղինակությունն էդ քաղաքում ավելի բարձր է, քան իմը, կարող եք դրանում համոզված լինել:
– Պարոն Շահգալդյան, ԲՀԿ-ն խորհրդարանական ընտրություններում հաղթել էր Ձեր մարզում, կարծում եք՝ նոր մարզպետին կհաջողվի՞ իրավիճակ փոխել:
– Էդ հարցերն անցյալ ա, մարդիկ ապագայով են ապրում: Նոր մարզպետին կտաք էդ հարցերը:
Լուսանկարը՝ Photolure-ի