ԱՄՆ-ում «Սենդի» փոթորիկը վրա հասավ նախընտրական քարոզարշավի ամենաթեժ պահին՝ գլխիվայր շրջելով ամեն ինչ: Այս մասին Stern-ում գրել է Նիլս Կրուզը: Սակայն հեգնանքն այն է, որ տարերային աղետը միավորներ է ավելացրել թեկնածուի օգտին, որն այս օրերին կարող է ընդհանրապես չզբաղվել նախընտրական քարոզարշավով, քանի որ նա ԱՄՆ նախագահ Բարաք Օբաման է:
ԱՄՆ-ի գործող նախագահ Բարաք Օբամային հաջողվել է առաջ անցնել Ռոմնիից նաև այսպես կոչված «տատանվող նահանգներում»:
«Չնայած մի քանի նահանգներում տարբերությունը կազմում է ընդամենը մեկ տոկոս, Օբաման ամեն դեպքում կարող է հաղթանակի ակնկալիք ունենալ: Բանն այն է, որ ամերիկյան օրենքների համաձայն՝ հաղթողը ստանում է ամեն ինչ. եթե թեկնածուներից մեկը նահանգի ներսում ավելի շատ ձայն է հավաքում մյուս թեկնածուների համեմատ, ապա նա ստանում է նահանգի էլեկտրոնային բոլոր ձայները»,- գրում է Կրուզը:
Հեղինակի կարծիքով՝ ի տարբերություն Ռոմնիի, որը նվիրատվություններ անելու կոչեր է անում, Օբաման մեծ առավելություն ունի: Բարաք Օբամայի անունը կապվում է ամերիկյան իշխանությունների հետ, որոնք փորձում են պայքարել տարերային աղետի հետևանքների դեմ: Ինչպես նշում է Կրուզը, Օբաման գերազանց է կատարել իր աշխատանքը և արդեն արժանացել է հանրապետական, Ռոմնիի ամենավառ երկրպագու Նյու Ջերսիի նահանգապետ Քրիս Քրիստի գովեստին:
«Միթ Ռոմնին գտնվում է շատ անբարենպաստ դրության մեջ, քանի որ նրա ցանկացած գործողություն առաջ է բերում լուրջ քննադատություն. մերթ ասում են, թե նա փորձում է քաղաքական շահաբաժին կորզել աղետից, երբ նա հարգանքի տուրք է մատուցում զոհերի հիշատակին, մերթ նրան մեղադրում են անսիրտ լինելու և անգործության մեջ»,-եզրափակում է հեղինակը:
