Ֆրանսիայի պատմության մեջ ամենացածր վարկանիշ ունեցող նախագահ Ֆրանսուա Օլանդը հույս ունի, որ իր աշխատանքի մասին ֆրանսիացիները կդատեն հնգամյա ժամկետի ավարտից հետո: Այս մասին նա ասել է երեքշաբթի օրը BFMTV հեռուստաալիքի եթերում:
Օլանդը Ֆրանսիայի նախագահ է ընտրվել 2012-ի մայիսի 6-ին: Երկուշաբթի օրը հրապարակվել է Nice-Matin պարբերականի պատվերով CSA հետազոտական ինստիտուտի կատարած հարցման արդյունքները, ըստ որոնց՝ ֆրանսիացիների բացարձակ մեծամասնությունը՝ 86%-ը, բացասական է համարում նախագահի պաշտոնում Օլանդի աշխատանքի երկու տարիների արդյունքները:
«Ես հաղթեցի, որովհետև իմ նախորդը տապալվեց: Ֆրանսիացիներն ինձ ընտրեցին, որովհետև հույս ունեին, որ իրավիճակն արագորեն կփոխվի դեպի լավը: Բայց ես խնդրում եմ, որ ինձ դատեն նախագահական ժամկետի վերջում»,- ասել է Օլանդը:
Նա խոստովանել է, որ նախընտրական շատ խոստումներ առայժմ չի հաջողվել պահել, բայց նշել է, որ իշխանություններն աշխատում են այդ ուղղությամբ: «Իմ առաջադրանքն է՝ Ֆրանսիան նորից շարժի բերել… Նախքան ընտրությունները ես գիտեի երկրում տիրող վիճակը: Ես չէի սպասում, որ իրավիճակն օր օրի կլավանար»,- ասել է Օլանդը:
Նա նշել է, որ երկրի տնտեսական վիճակն աստիճանաբար հարթվում է, ՀՆԱ-ն դանդաղորեն աճում է, և խոստացել է, որ ժամանակի ընթացքում նախընտրական խոստումները կկատարվեն:
