Այսօր «Առաջին լրատվական»-ի հետ զրույցում քաղաքական և ընտրական տեխնոլոգիաների փորձագետ Արմեն Բադալյանը, անդրադառնալով ՀՀ ԱԺ նախագահ Հովիկ Աբրահամյանի այն համոզմանը, թե ՀՀ գործող նախագահ Սերժ Սարգսյանը որևէ լուրջ մրցակից չունի, ասաց. «Քաղաքական ուժերն իրենց ապագա գործողությունները չեն կարող պլանավորել` ինչքան էլ բարեկամական հարաբերություններ ունենան»:
Ըստ Ա. Բադալյանի՝ այն, որ Հանրապետական կուսակցության տարբեր պաշտոնյաներ նշում են, որ իրենց կուսակցության ղեկավարն այլընտրանք չունի, հասկանալի է, քանի որ իրենք այդ կուսակցության ներկայացուցիչներ են և իրենց կուսակցության ղեկավարին են համարում երկրորդ ժամկետում նախագահի թեկնածու: «Սա շատ նորմալ է: Այլ կուսակցությունների ներկայացուցիչներ էլ ամենամրցունակը համարում են իրենց թեկնածուին: Դա սովորական է»,- կարծիք հայտնեց Արմեն Բադալյանը:
Արձագանքելով նաև Հովիկ Աբրահամյանի ցանկությանը, որ ԲՀԿ-ն սատարի ՀՀԿ թեկնածուին, ասաց, որ դա Հանրապետականը չի որոշելու` ԲՀԿ-ն կունենա՞ սեփական թեկնածու, կմասնակցի՞ ընտրություններին, թե՞ ոչ: Նրա համոզմամբ՝ դա ԲՀԿ-ն ինքը կորոշի:
«Հայաստանում չի որոշվելու` ԲՀԿ-ն կկազմի՞ կոալիցիա, թե՞ ոչ: Հայաստանի հասարակության պահանջով չէ, որ դա որոշվելու է, որովհետև ՀՀ-ի ներքաղաքական զարգացումների վրա մեծ ազդեցություն են ունենալու աշխարհաքաղաքական կենտրոնները, և քանի որ ՀՀ նախագահական ընտրությունների վերաբերյալ դեռևս աշխարհաքաղաքական որոշում չկա, քաղաքական ուժերի մեծամասնությունը լռում է: Բոլորն էլ հասկանում են, որ պետք է լռել. քանի դեռ մեսիջ չկա, չեն կարող իրենց ապագա գործողությունները պլանավորել` ինչքան էլ ունենան բարեկամական և ընկերական հարաբերություններ: Բարեկամությունը և ընկերությունը չեն որոշելու»,- մեկնաբանեց Արմեն Բադալյանը:
Հիշեցնենք, որ Ազգային ժողովի նախագահ Հովիկ Աբրահամյանը ևս կարծիք էր հայտնել, որ քաղաքական դաշտում Սերժ Սարգսյանը չունի որևէ լուրջ մրցակից, ով առաջիկա նախագահական ընտրություններում մրցապայքարի կմտնի գործող նախագահի հետ։
Նա նաև ցանկություն էր հայտնել, որ «Բարգավաճ Հայաստան» կուսակցությունը սատարի Սերժ Սարգսյանին, քանի որ երկու ուժերը նախկինում եղել են կոալիցիոն գործընկերներ:
