Կրթության և գիտության նախարար Արմեն Աշոտյանը կառավարության այսօրվա նիստում ներկայացրեց իր ղեկավարած ոլորտի ֆինանսական հաշվետվությունը: Հիշեցնենք, որ վարչապետը նախարարներին հանձնարարել է ֆինանսական և իրենց ոլորտի հարկային հավաքագրումների վերաբերյալ հաշվետվություններ ներկայացնել:
Աշոտյանը նշեց, որ դպրոցներում աշխատավարձը շուրջ 120 հազար դրամ է կազմում: «Քանի որ զերծ ենք մնում զանգվածային կրճատումներից, և դեռևս դպրոցներում աշխատում են ուսուցիչներ, որոնք անգամ կես դրույք չունեն, այս դեպքում նրանց միջին աշխատավարձը 80 հազար դրամ է կազմում: Չնայած հաշվարկային միավորը բյուջեում 35 տոկոս ավելի է»,- ասաց նա:
Այս տարվա ութ ամիսների կտրվածքով կրթության բնագավառի վճարովի ծառայությունների քանակը նվազել է` պայմանավորված հիմնականում բուհերում վճարովի ուսանողների քանակի նվազեցման հետ: Բուհերից 12-ը սոցվճարների մասով խոշոր հարկատու են համարվում: Անգամ հարյուր խոշոր հարկատուների ցանկում կան բուհեր: «Այս հարկատեսակի մասով այս տարվա ութ ամիսներին աճը կազմել է 15 տոկոս: Հոկտեմբերի 8-ի դրությամբ՝ համակարգի գերավճարը կազմել է 3 մլրդ 307 մլն դրամ, ապառքը` 11 մլն դրամ»,- ասաց Աշոտյանը: Ոլորտում գործող հիմնական հարկ վճարող կազամակերպությունների կողմից այս տարվա առաջին կիսամյակում վճարվել է 4 մլրդ 916 մլն դրամ հարկ. անցած տարվա նույն ժամանակահատվածի համեմատ այս ցուցանիշը 11.4 տոկոսով աճել է: Ավագ դպրոցներից ԱԱՀ-ով են հարկվում 39-ը:
Արմեն Աշոտյանն առաջարկեց ընդլայնել ոլորտի կողմից մատուցվող վճարովի ծառայությունների քանակը և որակը` ներմուծելով ժամանակակից կրթական ծառայություններ: Նա առաջարկեց նաև բուհերում ավելացնել օտարազգի ուսանողների թիվը` ստեղծելով պայմաններ: Վերջին երկու տարիներին, ըստ նրա, 900 հնդիկ ուսանող է ընդունվել հայաստանյան բուհեր: Աշոտյանը նշեց, որ եթե հանրակացարաններ կառուցվեն, այդ թիվը կավելանա:
Վարչապետ Տիգրան Սարգսյանը, լսելով հաշվետվությունը, նշեց. «Սա շատ օգտակար վարժություն է, որպեսզի գտնենք այն բանաձևը, թե ինչպես պետք է համագործակցենք և բացահայտենք պոտենցիալը, որն առկա է ըստ ճյուղերի»:
Ի դեպ, ԿԳ նախարարը նշեց, որ 21 տարվա ընթացքում նախարարությունն առաջին անգամ է նման հաշվետվություն ներկայացնում:
