Նյու Յորքի Ջոն Քենեդու անվան միջազգային օդանավակայանը և հարևան Նյու Ջերսի նահանգի «Նյուարք» միջազգային օդանավակայանը տեղի ժամանակով ժամը 07:00-ին մասամբ կվերականգնեն աշխատանքը: Սակայն «Լա Գարդիա» օդանավակայանը, որը նույնպես սպասարկում է ամերիկյան խոշորագույն մեգապոլիսը, նախկինի պես կշարունակի փակ մնալ: Այս մասին հայտնել է Նյու Յորքի և Նյու Ջերսիի տրանսպորտային վարչությունը:
Երեք օդանավակայանները փակվել էին երկուշաբթի՝ փոթորկի հարվածից մի քանի ժամ առաջ: Օրական այդ օդանավակայանները սպասարկում են 300 հազար ուղևորի:
Դեռևս հայտնի չէ, թե որ ավիաընկերություններն առաջինը կվերսկսեն աշխատանքը: Իշխանությունները խորհուրդ են տվել ուղևորներին, մինչ օդանավակայան գալը, հստակեցնել իրենց չվերթների մասին տեղեկությունը:
Ընդհանուր առամամբ՝ կիրակի օրվանից ԱՄՆ-ի արևելյան ափում ավելի քան 18 հազար չվերթ է չեղյալ հայտարարվել:
