«Ժառանգության» ներկայացուցիչ Ստյոպա Սաֆարյանն այսօր, «Առաջին լրատվական»-ի հետ հարցազրույցում անդրադառնալով ԱԺ նախագահի պաշտոնում Գալուստ Սահակյանի թեկնածության երեկվա քվեարկությանը, հայտարարեց. «ԲՀԿ դիրքոշումն ինձ համար բավական անսպասելի էր: ԲՀԿ խմբակցության ճնշող մեծամասնությունը հայտնվեց իշխանության դաշտում»: Սաֆարյանի կարծիքով՝ որքան էլ հիմնավորումներ բերվեն, որ քվեարկությունն ազատ է թողնվել պատգամավորների կամքին, դա հասկանալի չէ: «Նույնիսկ բարոյական չէ հասարակությանը ներկայանալ, որ մենք ընդդիմադիր համախմբում ենք իրականացնում, բայց իրականության մեջ ունենալ միանգամայն այլ պատկեր»,- ասաց «Ժառանգության» ներկայացուցիչը:
Ըստ Սաֆարյանի՝ ԱԺ նախագահի պաշտոնում Գալուստ Սահակյանի թեկնածության երեկվա քվեարկությունը ցույց տվեց, որ ՕԵԿ-ը հայտնի չէ, թե ում է ընդդիմություն: «Երեկվա քվեարկությամբ ՕԵԿ-ը ցույց տվեց, որ իր համար բարոյական չէ ոչ միայն Սերժ Սարգսյանի հրաժարականը պահանջելը, այլև Գալուստ Սահակյանի թեկնածությանը դեմ քվեարկելը: Հետևաբար, թե ինչին է ընդդիմադիր ՕԵԿ-ը, կարծում եմ՝ դարի մեծագույն գաղտնիքն է»:
Անդրադառնալով վարչապետ Հովիկ Աբրահամյանի դիրորոշմանը «Պարտադիր կուտակային կենսաթոշակի» օրենքի առթիվ՝ «Ժառանգության» ներկայացուցիչն ասաց. «Մենք ունենք երկու Հովիկ Աբրահամյաններ, մի Հովիկ Աբրահամյան, որն ամեն ինչ արեց կուտակայինի օրենքը գերագույնս կազմակերպելու և անցկացնելու համար, և ունենք Հովիկ Աբրահամյան, որը եկավ, վարչապետ դարձավ ու, որպես գործադիրի ղեկավար. սկսել է դեմ խոսել հենց այդ պարտադիր բաղադրիչին»:
Դիտեք Ստյոպա Սաֆարյանի հետ հարցազրույցը:
