Ադրբեջանական Turan լրատվական գործակալության փոխանցմամբ՝ Amnesty İnternational (AI) միջազգային իրավապաշտպան կազմակերպությունը հատուկ զեկույց է հրապարակել Ադրբեջանում քաղաքացիական ազատությունների վերաբերյալ:
Զեկույցում նշված է, որ Ադրբեջանում լրջորեն սահմանափակված է խոսքի ազատությունը, և որ այն անձինք, ովքեր համարձակվում են քննադատել նախագահ Իլհամ Ալիևին, նրա ընտանիքին կամ կառավարությանը, իրենց ենթարկում են լուրջ ռիսկի: AI-ն Ադրբեջանի իշխանություններին կոչ է արել դադարեցնել այլախոհների հետապնդումները և ապահովել ազատ արտահայտվելու արմատական իրավունքը:
AI-ի զեկույցում շարադրված են Ադրբեջանում քաղաքացիների իրավունքների ու ազատությունների խախտման բազմաթիվ փաստեր, որոնց թվում են նաև բլոգերների, իրավապաշտպանների ու լրագրողների հետապնդումները: Զեկույցում հատուկ ուշադրություն է դարձված Նախիջևանին, ուր մարդու հիմնական ազատություններն առավել շատ են ոտնահարվում, քան բուն Ադրբեջանում:
AI-ն նաև միջազգային կառույցներին և ԱՄՆ-ի, ԵՄ-ի ու այլ գործընկերներին կոչ է անում ավելի մեծ ուշադրություն հատկացնել Ադրբեջանում մարդու իրավունքների պահպանման խնդրին, պահանջել խղճի բոլոր բանտարկյալների անհապաղ ազատ արձակում, մեծացնել Ադրբեջանում քաղաքացիական ակտիվիստների աջակցությունը:
