ԱՄՆ նախագահ Բարաք Օբաման Նյու Յորքն ու Լոնգ Այլենդ կղզին հայտարարել է աղետի գոտի,- հաղորդում է Associated Press-ը:
«Սենդի» փոթորկից տուժած տարածքներին այդ կարգավիճակի շնորհումը թույլ է տալիս դաշնային բյուջեից միջոցներ հատկացնել աղետից տուժած քաղաքացիներին օգնելու համար: Ըստ չճշտված տեղեկությունների՝ Օբաման աղետի գոտի է համարել նաև Նյու Ջերսին, որտեղ մի քանի ժամ առաջ փոթորիկը քանդել է արգելապատնեշը:
Բացի այդ՝ ԶԼՄ-ները հաղորդում են, որ արտակարգ իրավիճակ է հայտարարվել Վիրջինիա և Արևմտյան Վիրջինիա նահանգներում:
Վերջին տվյալների համաձայն՝ «Սենդին» շարժվում է արևմուտք՝ մոտենալով Ֆիլադելֆիային: Առանց էլեկտրաէներգիայի է մնացել 7,5 մլն ամերիկացի: ԱՄՆ տնտեսությանը փոթորկի հասցրած վնասը կազմել է 20 մլրդ դոլար,- կարծում են վերլուծաբանները:
