«Առաջին լրատվական»-ի RealPolitik հաղորդաշարի հյուրն է ՀՀԿ խմբակցության պատգամավոր Մարգարիտ Եսայանը:
– Տիկին Եսայան, իշխող ՀՀԿ-ն, ըստ էության, մնաց մենակ, և երբ խոսվում էր կոալիցիոն գործընկերության մասին, և կուլիսների ետևում բանակցում էին դաշտի հիմնական խաղացողների հետ կոալիցիա կազմելու հնարավորության շուրջ, հիմնական խաղացողները մերժեցին: Վերջի զգացողություն չունե՞ք, որ այսպիսի պատասխանատու պահին, երկրի համար այս ծանր պահին ՀՀԿ-ն չկարողանա այս պայքարում հաջողել և հաղթանակած դուրս գալ:
– Իրականում որևէ պետության մեջ իշխանությունը չի կարող միայնակ մնալ և միայնակ չէ: Դա թվացյալ միայնություն է: Բայց պատասխանատվության մասով համաձայն եմ՝ ամբողջ պատասխանատվությունը հենց իշխող ուժի վրա է: Դրանից իշխող քաղաքական ուժը ոչ թե թուլանում է կամ երերում, այլ ընդհակառակը՝ երբ գիտես, որ մնում ես քո երկրի, քո պետության վտանգների լարվածության խնդրի առաջ, ավելի ես գիտակցում պահի լրջությունը և ավելի ես ինքնակազմակերպվում՝ լուծելու համար այդ խնդիրները:
Ձեր նշած հիմնական խաղացողներ արտահայտությունը քմծիծաղ է առաջացնում, որովհետև եթե հիմնական խաղացողների նպատակը երկրի խնդիրները օր առաջ լուծելն է, ուրեմն իրենք պետք է պատրաստ լինեին հոգեբանորեն համագործակցել և կանգնել իշխող քաղաքական ուժի կողքին, ընդ որում՝ հրավերներ կային: Այս ուժը բաց էր միասին աշխատելու համար, բայց չարվեց դա, ինչն ունի և օբյեկտիվ, և սուբյեկտիվ պատճառներ:
– Որո՞նք են:
– Ես կարծում եմ՝ հիմնական խաղացող ոչ իշխանական ուժերը շատ անհանգիստ են այսօր, որովհետև իրենք տեսնում են հենց իրենց գլխին կախված վտանգները: Իրենք տեսնում են, որ ամբողջովին փոշիացրել են ընդդիմադիր դաշտը: Նրանք տեսնում են, որ շատ վատ բան են արել՝ մեր հասարակությանը հուսախաբ անելով ճանապարհին, իրենք տեսնում են, որ ինքնադիմանկարի փրկության առջև են կանգնած, և չի ստացվում փրկել իրենց դեմքը: Չի ստացվում փրկել հասարակության հավատը ընդդիմադիր կոչվող ուժերի նկատմամբ: Եվ այդ պատճառով համարձակություն չունեն իրենց կոչել ընդդիմադիր քաղաքական ուժ:
Հարցազրույցն ամբողջությամբ դիտեք տեսանյութում
