Անկարան Հայաստանի և հայերի նկատմամբ բարի կամքի ժեստ է արել և հույս ունի, որ Երևանը կկարողանա գնահատել դա: Այս մասին, ինչպես հաղորդում է թուրքական TRT Haber հեռուստաալիքը, հայտարարել է Թուրքիայի վարչապետ Ռեջեփ Թայիփ Էրդողանը «Արդարություն և զարգացում» կուսակցության հերթական համագումարին:
Էրդողանը նշել է, որ «1915 թվականի իրադարձությունները քաղաքական նպատակներով են օգտագործվել»: Նրա խոսքով՝ Թուրքիան չի վախենում իր պատմությունից, իսկ այն երկրները և ժողովուրդները, որոնք «1915 թվականի իրադարձություններն օգտագործում են իրենց շահերի համար, պետք է պատրաստ լինեն առերեսվել իրենց սեփական պատմության հետ»:
«Ժողովուրդները, որոնք դարձել են պատմության գերիներ, ի վիճակի չեն ապագա կառուցել: Թուրքիան մեծ երկիր է և չի վախենում իր պատմությունից»,- ասել է նա:
Էրդողանը հերթական անգամ նշել է, որ Թուրքիան պատրաստ է բացել իր բոլոր արխիվները, և դրան պետք է պատրաստ լինի նաև Երևանը:
Հիշեցնենք, Ցեղասպանության նախօրեին Թուրքիայի վարչապետի գրասենյակը հայտարարություն էր տարածել՝ հերթական անգամ նշելով, որ 1915թ. զոհվել են ինչպես հայեր, այնպես էլ քրդեր, թուրքեր, արաբներ, ինչպես նաև ցավակցություն էր հայտնել զոհվածների թոռներին:
