Իտալիան կարիք չունի ֆինանսական օգնության համար դիմել ԵՄ-ին: Այսպիսի կարծիք է հայտնել երկրի վարչապետ Մարիո Մոնտին՝ Իսպանիայի կառավարության նախագահ Մարիանո Ռախոյի հետ իսպանա-իտալական համաժողովի շրջանակներում անցկացված բանակցություններից հետո:
«Ես կարծում եմ, որ Իտալիան այնպիսի իրադրությունում չի գտնվում, որպեսզի դիմի ԵՄ-ի ֆինանսական օգնությանը»,-հայտարարել է Մոնտին: Նա նշել է, որ մտավոր և քաղաքական բավարարվածություն է զգում նրանից, որ Իտալիան աջակցել է ֆինանսական օգնություն տրամադրելու նոր մեխանիզմների մշակմանը. «Հիմա ավելի կարևոր է ապահովել այդ մեխանիզմների իրական գործունեությունը»: Մոնտին հույս է հայտնել, որ ԵՄ-ն քայլեր կձեռնարկի միջազգային ֆինանսական շուկայում իրավիճակը կայունացնելու համար:
Իր հերթին Մարիանո Ռախոյը ևս ասել է, որ իսպանական կառավարությունը ԵՄ-ի ֆինանսական օգնությունը չի համարում երկրի տնտեսական պաշտպանության հիմնական աղբյուրը: Ռախոյը նշել է, որ ֆինանսական օգնության դիմելն ինքնին դրական երևույթ է, սակայն Իսպանիան դրանից օգտվելու մտադրություն չունի:
Իսպանիայի և Իտալիայի վարչապետները նշել են, որ իրենք ԵՄ-ի վերաբերյալ համակարծիք են, և հայտնել են եվրոպական բանկային միության շուտափույթ ստեղծման մտադրության մասին։
