Հաջորդաբար կեղծվող ընտրությունները հասարակությանը դրել են մի իրավիճակի մեջ, որ ժողովուրդն ակնկալիք չունի, ավելին՝ որոշակի հիասթափություն ունի, այլընտրանքի փնտրտուք: Սակայն ժողովուրդն իր խոսքը դեռ կասի: Այսօր լրագրողների հետ հանդիպման ժամանակ այս մասին ասաց ԱԺ պատգամավոր Լյուդմիլա Սարգսյանը՝ խոսելով ներքաղաքական իրողությունների և ապագա հնարավոր զարգացումների շուրջ:
Անդրադառնալով ՀՀԿ ներկայացուցիչների հայտարարություններին նախագահական ընտրություններում Սերժ Սարգսյանի թեկնածության անմրցակցային լինելու մասին՝ նա ասաց, որ կա թույլ իշխանություն, որը չունի ժողովրդի վստահությունը, խնդիրներին լուծումներ տալու կամային հատկություններ: Հետևաբար, բանախոսի համոզմամբ, վստահությամբ խոսել ընտրությունների մասին իշխանության թևն իրավունք չունի, ավելին՝ Սերժ Սարգսյանն ինքը կարող է այլընտրանք դառնալ՝ երկրորդ-երրորդ տեղի համար պայքարելով: Նրա կարծիքով՝ զարգացումները դեռևս առջևում են:
Անդրադառնալով ՀԱԿ- ԲՀԿ հնարավոր համագործակցության շուրջ խոսակցությունների մասին ՀԱԿ ներկայացուցիչների հակասական հայտարարություններին՝ նա ասաց, որ համագործակցություն դեռ չկա: Ըստ Լ. Սարգսյանի՝ եթե կան քաղաքական ուժեր, որոնք պատրաստ են զուգահեռ պայքարի մեջ մտնելու ՀԱԿ-ի հետ, գիտակցում են, որ ռեժիմը պետք է փոխվի, ուրեմն չկան հավերժ թշնամիներ և բարեկամներ: Ուստի, բանախոսի կարծիքով, եթե ԲՀԿ-ն այսօր պատրաստ է, գիտակցել է, որ այս իշխանությունը հեռանկար չի ապահովում հասարակության համար, գուցե պետք է ենթադրել՝ ազնվացել է:
«Եթե Մարտի 1-ի մասին խոսենք, բոլոր նրանք, ովքեր մասնակից են եղել այդ գործում, այդ թվում՝ ԲՀԿ ներկայացուցիչները, պատժից չեն խուսափի, եթե գան իշխանության»,- մեկնաբանեց բանախոսը: Նա նաև խոսեց փորձագետների կարծիքներից, թե ՀԱԿ-ը ցանկանում է ԲՀԿ կցորդը դառնալ՝ վստահեցնելով, թե ՀԱԿ-ն այն քաղաքական ուժը չէ, որ կցորդ դառնա:
